АҚШ-та ірі компаниялар ЖИ қолдануды азайта бастады

АҚШ Халық санағы бюросының (U.S. Census Bureau) жаңа деректеріне сәйкес, 2022 жылдан бері алғаш рет ірі компаниялар жасанды интеллектіні (ЖИ) пайдалану деңгейін қысқартты, деп хабарлайды El.kz интернет порталы.

Business Trends and Outlooks Survey (BTOS) зерттеуіне сай, қызметкерлер саны 250-ден асатын фирмаларда ЖИ қолдану үлесі маусым айындағы 13,5%-дан тамыздың соңына қарай шамамен 12%-ға дейін төмендеген. Бұл көрсеткіш 2022 жылдан бері алғаш рет құлдырап отыр. Орта және шағын бизнес арасында да ұқсас үрдіс байқалады, дегенмен кейбір шағын компаниялар, керісінше, ЖИ енгізуді жалғастырып жатыр.

Сарапшылардың сөзінше, алғашқы дүрбелең ЖИ-ға жаппай инвестиция салуға әкелгенімен, практикалық тиімділігі күткен деңгейден төмен болды.

Қосымша фактор ретінде сынның күшеюі де әсер етті. Стэнфорд пен Гарвард зерттеулері ЖИ ең алдымен жас мамандарды және бастапқы деңгейдегі қызметкерлерді ығыстыратынын, бірақ компания шығындарын азайта бермейтінін көрсетті.

Соған қарамастан, сала әлі де өсім үстінде. NVIDIA-ның графикалық процессорларына (GPU) сұраныс әлі де ұсыныстан жоғары.