Ақмолада сапасыз жолдар үшін 96 шенеунік жауапқа тартылды

Жыл басынан бері облыстың тәртіп сақшылары барлық маңызы бар автожолдарға 957 тексеру жүргізген, деп хабарлайды El.kz ақпарат агенттігі Polisia.kz-ке сілтеме жасап. 

Тексеру нәтижесінде 1268 ақау анықталып, сапасыз жолдар үшін 96 лауазымды тұлға әкімшілік жауапкершілікке тартылды. Олардың ішінде жол ұйымдарының бірінші басшылары, облыстағы қалалық және ауылдық округтердің әкімдері бар.

Қазіргі жағдайда жол қауіпсіздігінің жоғары деңгейіне әкімшілік шаралармен қол жеткізу мүмкін емес. Ол үшін жол-көлік инфрақұрылымын жақсартып, жол қозғалысын ұйымдастыру деңгейін арттыру қажет, – деп атап өтті облыстың әкімшілік полиция басқармасы бөлімінің аға инспекторы Руслан Ержанов. 

Әкімшілік полиция басқармасының қызметкерлері жол ұйымдарының өкілдерімен бірлесіп, 10 мамырдан бастап автомобиль жолдарын, көше-жол желілері мен жол құрылыстарын көктемгі кешенді тексеру жүргізуді жоспарлап отыр.

Тексеру барысында мамандар жол белгілері мен бағыт көрсеткіштерін орнату және ауыстыру, автобус павильондары мен тұрақтарды, сондай-ақ басқа да құрылыстарды жөндеу қажеттігіне назар аударатын болады.