Антальяда футболдан Қазақстан суперкубогының ойындары өтеді

Ертең Түркияның Анталья қаласында футболдан Қазақстан Суперкубогының ойындары өтеді, деп хабарлайды El.kz ақпарат агенттігі 24KZ-ке сілтеме жасап.

Айтулы бәсеке ел чемпионы «Ордабасы» мен ел кубогының жеңімпазы «Тобыл» командаларының арасында өрбиді. Бұл премьер лиганың алдында ала доп аламандарына бір-бірінің күшін бағамдауға жақсы мүмкіндік.

Футболдан Қазақстан Суперкубогы алғаш рет шет мемлекетте өткелі жатыр. Мамандар мұның себебін, еліміздегі стадиондарда жөндеу жұмыстарының жүргізілуімен және климат қолайсыздығымен түсіндірді.

Футбол ойындары өтетін алаң спортшыларға барынша қолайлы болуы тиіс. Алматыда өткізер едік, бірақ, күн суық, қар әлі ерімеді. Ауа райы қолайсыз. Спортшыларымыз алдыңғы маусымда дайындықты осы алаңда аяқтады. Сондықтан оларға осы жер ыңғайлы болар еді. Біз ұлттық құраманың жанкүйері ретінде Грекиямен матч қарсаңында футболшыларымыз жарақат алып қалмауын қадағалауымыз керек. Осы тұрғыдан біз ұтымды шешім қабылдадық деп ойлаймын, - дейді спорт журналисі Айдын Қожахмет.