«Алтын доп» әділ иесін тапты ма? Харри Кейннің тарихи маусымы

26 қазанда Лондонда футбол әлемі асыға күткен «Алтын допты» марапаттау рәсімі өтті.

Биылғы жүлде жолындағы бәсеке ерекше тартысты болды. Ақыры бас жүлде «Бавария» мен Англия құрамасының шабуылшысы Харри Кейнге бұйырды. Ал оның жеңісі кездейсоқ нәтиже емес – бұл ұзақ жылғы еңбектің жемісі.

«Алтын допқа» қатысты пікірталас жылда тартысты болады. Бірі марапат иесін командалық жетістіктерге қарап бағаласа, енді бірі футболшының жеке көрсеткіштері мен ойынға қосқан үлесін маңызды санайды. Биыл да жанкүйерлер мен сарапшылар пікірі сан-саққа жүгірді. Ламин Ямаль, Килиан Мбаппе, Майкл Олисе, Хвича Кварацхелия сынды жұлдыздардың есімі жиі аталды. Тіпті Лионель Мессидің мүмкіндігін де жоққа шығармағандар болды. Дегенмен марапат қорытындысы Харри Кейннің пайдасына шешілді. Ағылшын шабуылшысы өткен маусымда клубы мен ұлттық құрамасы сапында 73 гол соғып, 8 нәтижелі пас берді. «Бавариямен» бірге Германия чемпионаты мен кубогын жеңіп, Чемпиондар лигасының жартылай финалына дейін жетті. Ал Англия құрамасымен бірге әлем чемпионатында қола жүлдеге қол жеткізді.

Кейннің жеңісі неге әділ?

Кейннің «Алтын допқа» лайық екенін дәлелдейтін басты екі себеп бар. Біріншісі – оның статистикасы. Екіншісі – алаңдағы ойыны мен командаға тигізетін пайдасы.

73 гол – кез келген шабуылшы үшін орасан көрсеткіш. Оның үстіне бұл нәтиже Кейннің тек бір турнирде немесе бір командада жарқырап көрінбегенін аңғартады. Ол клубта да, ұлттық құрамада да тұрақты ойнап, шешуші сәттерде жауапкершілікті өз мойнына алды. Алайда Кейнді тек гол соғу қабілетімен бағалау дұрыс емес. Ол – дәстүрлі орталық шабуылшының міндетімен шектелмейтін футболшы. Қажет кезде шабуылды ұйымдастыруға қатысады, қорғаныс пен жартылай қорғаныс арасындағы байланысты күшейтеді. Кейде қапталға ауысып, қарсылас шабуылын тоқтатуға да көмектеседі. Алаңда әмбебап шабуылшылар көп емес. Кейннің ерекшелігі сол, ол гол соғып қана қоймай, әріптестеріне мүмкіндік жасап, команданың ойынын жақсарта алады. Ол өзім ғана гол соғамын деген мақсаттан аулақ, ұжымдық нәтижені бірінші орынға қояды.

Осы тұрғыдан алғанда, Кейннің жетістігін тек статистикамен өлшеу жеткіліксіз. Ол алаңдағы жағдайды көре алады, ойынның бағытын сезеді және командаға қай жерде көбірек пайда келтіре алатынын біледі. «Алтын доп» секілді жеке ойыншыға берілетін марапатта мұндай қасиеттер де ескерілуі керек.

Таланттан футбол шыңына дейін

Харри Кейннің мансабы бір күнде қалыптасқан жоқ. Жас кезінде оны әлемдік футболдың ең жарық жұлдызы болады деп болжағандар аз еді. Кәсіби мансабының алғашқы кезеңінде лайықты бағасын да алған жоқ. Бірақ Кейн біртіндеп дамып, Еуропадағы ең нәтижелі шабуылшылардың біріне айналды. Ол «Тоттенхэм» сапында ұзақ жыл ойнап, жеке көрсеткіштері жоғары болғанына қарамастан, маңызды командалық трофейлерге қол жеткізе алмай келді. Соған қарамастан күресіп, гол салуды жалғастырды.

«Баварияға» ауысқаннан кейін де оның басты мақсаты өзгерген жоқ: командаға жеңіс әкелу және жеке шеберлігін жаңа деңгейге көтеру. Енді оның қоржынында «Алтын доп» бар. Бұл – Кейннің ұзақ жолдағы ең маңызды жетістіктерінің бірі. Дегенмен ағылшын шабуылшысының алдында әлі де үлкен мақсаттар тұр. Ол Чемпиондар лигасын жеңіп, ұлттық құрамамен ірі халықаралық турнирде топ жаруды армандайды. «Алтын доп» мансабындағы маңызды белес болғанымен, Кейн үшін соңғы меже емес.

Мбаппе мен Ямаль жүлдесіз қалды

Биылғы дауыс беру қорытындысы бойынша екінші орынды «Реал» мен Франция құрамасының шабуылшысы Килиан Мбаппе иеленді. Үшінші орын «Барселона» мен Испания құрамасының жас жұлдызы Ламин Ямальға бұйырды.

Үздік ондыққа Майкл Олисе, Родри, Лионель Месси, Фабиан Руис, Усман Дембеле, Хвича Кварацхелия және Эрлинг Холанд та енді.

Үміткерлердің әрқайсысының өз артықшылығы бар. Бірі жеке статистикасымен көзге түссе, енді бірі командалық табыстарымен ерекшеленді. Сондықтан биылғы бәсекенің бірнеше ай бойы талқылануы заңды.

Қақпашылар арасындағы таңдау пікірталас тудырды

Ерлер арасындағы үздік қақпашыға берілетін Лев Яшин атындағы жүлде Испания құрамасы мен «Атлетик» клубының қақпашысы Унаи Симонға табысталса, әйелдер арасында «Барселона» өкілі Ката Коль марапатталды.  

Бұл шешімге қатысты сұрақтар туындағаны рас. Симон – мықты қақпашы, алайда өткен маусымды оның ең үздік кезеңдерінің бірі болды деу қиын.

Ямаль үшінші рет үздік жас футболшы атанды

«Копа» жүлдесі тағы да Ламин Ямальға бұйырды. «Барселона» мен Испания құрамасының ойыншысы бұл марапатты қатарынан үшінші рет иеленді.

Ямальдың талантына күмән келтіре алмайсың. Ол жасына қарамастан, әлемдік футболдағы ең жарқын ойыншылардың біріне айналды. Дегенмен бір футболшының үздік жас ойыншы атағын бірнеше рет алуы марапаттың мәніне қатысты пікірталас туғызады.

Жас футболшыларға арналған жүлденің мақсаты – үлкен футболға енді қадам басқан ойыншылардың әлеуетін бағалау және олардың жетістігін атап өту. Ал Ямаль бұл кезеңнен әлдеқашан өтіп кеткендей. Әйелдер арасында осы санаттағы марапат Вики Лопеске берілді.

Әйелдер футболында үздік футболшы – Алексия Путельяс

Әйелдер арасындағы «Алтын доп» «Лондон Сити Лайонессис» клубы мен Испания құрамасының жартылай қорғаушысы Алексия Путельясқа табысталды. Ол да бұл жүлдені үшінші рет жеңіп алды. Бұған дейін футболшы 2021 және 2022 жылдары үздік атанған еді.

Марапаттау рәсімінде өзге де номинациялар бойынша жеңімпаздар анықталды. Ерлер арасындағы үздік шабуылшы атағын Харри Кейн алса, әйелдер арасындағы үздік шабуылшы деп мексикалық «Пачука» клубының футболшысы Шарлин Корраль танылды.

Ерлер құрамалары арасында үздік бапкер атағы Испания құрамасының жаттықтырушысы Луис де ла Фуэнтенің еншісіне тисе, әйелдер футболында үздік бапкер атағы «Барселона» маманы Пере Ромеуге бұйырды.

Ерлер арасындағы үздік клуб – Париждің «ПСЖ» командасы, ал әйелдер футболында үздік клуб – «Барселона». Ал әлеуметтік және қайырымдылық жобалары үшін табысталатын Сократес жүлдесін «Арсенал» ойыншысы Букайо Сака иеленді.

Лондондағы ерекше кеш

Биылғы «Алтын доп» рәсімі Лондондағы «Палладиум» театрында өтті. Бұл орынның таңдалуы бекер емес: марапаттың 70 жылдығы атап өтіліп, оның алғашқы иегері – ағылшын футболшысы Стэнли Мэттьюз еске алынды.