Алматыда жеке тұрғын үйде жарылыс болып, бір адам көз жұмды

2025 жылғы 2 маусым күні Алматы қаласындағы Шапағат ықшам ауданында жарылыс болды, деп хабарлайды El.kz интернет порталы.

Жарылыс сәті көше бойындағы бейнебақылау камераларына түсіп қалған. Видео әлеуметтік желілерде тарап жатыр.

Қалалық Төтенше жағдайлар департаментінің мәліметінше, оқиға салдарынан 1980 жылы салынған жеке тұрғын үйдің құрылымдары опырылып түскен.

Оқи отырыңыз:

• Сәбилерді шетелге сатқан сегіз дәрігер сотталатын болды
• «Мазалағым келмейді». Бельгиядан келген Жәнібек анасын тапты ма

Алдын ала болжам бойынша, жарылыс газ-ауа қоспасының тұтануынан болған. Үй өртенбеген.

Сағат 13:55-те Алатау ауданы, Шапағат ықшамауданы, Биянху көшесіндегі үйдің қирандыларын бөлшектеу кезінде 1949 жылы туған азамат К.-нің денесі табылды, – деп мәлімдеді ТЖД өкілдері.

Қазір оқиға орнында жедел штаб құрылып, Алматы қаласының жергілікті атқарушы органдары, ТЖД, кинологтар, ҚР Төтенше жағдайлар министрлігінің республикалық жедел-құтқару жасағы, 109 Қалалық құтқару қызметі, Қауіпсіздік медицина орталығы мен басқа да қала қызметтері жұмылдырылған.

Жарылыстың нақты себебі мен мән-жайын анықтау үшін жедел-тергеу тобы жұмыс жүргізіп жатыр.