Алматыда үш шетел азаматынан 5 мыңнан астам SIM-карта тәркіленді

ҚМА Алматы қаласы бойынша департаменті үш шетелдік азаматтың жалға алған пәтерінен алты SIM-бокс анықтап, тәркіледі, деп хабарлайды El.kz ақпарат агенттігі.

ҚМА мәліметінше, бұл құрылғылар алаяқтық схемаларда кең көлемде қоңыраулар жасау, хабарламалар жіберу және абоненттік нөмірлерді өзгерту үшін қолданылады.

Сондай-ақ әртүрлі мобильді операторлардың 5 мыңнан астам SIM-картасы тәркіленді.

Аталған тұлғаларға қатысты ҚР Қылмыстык кодексінің 213-бабы 2-бөлігі бойынша – «ұялы байланыс абоненттік құрылғысының идентификациялық кодын заңсыз қолдану, абонентті сәйкестендіру құрылғысын заңсыз өзгерту және идентификациялық кодты өзгертуге арналған бағдарламаларды жасау, пайдалану, тарату» қылмыстық іс тіркелді, - делінген мәліметте.

Күдіктілер екі ай мерзімге қамауға алынды.

Олардың интернет-алаяқтыққа қатыстылығы тексерілуде.