Алматыда із-түссіз жоғалған 15 жасар нигериялық қыз табылды

Алматыда із-түссіз жоғалған 15 жасар нигериялық қыз табылды, деп хабарлайды El.kz Polisia.kz-ке сілтеме жасап.

Әуезов аудандық полиция басқармасына полиция бөлімшесінен хабарланғандай 12 қыркүйекке қараған түні қаладағы жалпы білім беретін мектептердің бірінде оқитын 15 жастағы оқушы жоғалып кеткен.

«Қыздың анасы 102 пультіне түнгі 01:40 минуттар шамасында қоңырау шалған. Әйелдің айтуынша, қызы үйде болған жанжалдан кейін кетіп қалған. Кәмелетке толмаған баланың жоғалғанын ескеріп, арнайы іздестіру тобы құрылды. Абырой болғанда, қыз табылып, ата-анасына аман-есен тапсырылды», – деді полиция бөлімшесінің бастығы Елнұр Құдретбаев.

Спикердің айтуынша, оқиғаның мән-жайы мен себептерін егжей-тегжейлі зерделеу барысында отбасының тәрбиелі екендігі анықталды. Олар Алматы қаласында 2021 жылдың қаңтар айынан бастап тұрады.