Алматыда екі жасар бала 105 магнитті моншақты жұтып қойды

Алматыда екі жасар бала 105 магнитті моншақты жұтып қойып, жедел ауруханаға жеткізілді. деп хабарлайды El.kz ақпарат агенттігі.

Қалалық денсаулық сақтау басқармасының мәліметінше, 20 ақпанда екі жас үш айлық бала Балаларға шұғыл медициналық көмек көрсету орталығына түскен. Ата-анасының айтуынша, шамамен бір апта бұрын қонақта болған кезде бала металл магниттерді жұтып қойған, бірақ олардың нақты саны белгісіз болған.

Рентгендік тексеру барысында дәрігерлер іш қуысында көлемі 6,2 × 2,2 см болатын металл заттардың шоғырын анықтады. Шұғыл түрде ауруханаға жатқызылған балаға шетелдік денелерді алып тастау мақсатында шұғыл медициналық көмек көрсетілді.

Алғашында мамандар эндоскопиялық әдіспен магниттерді алуға тырысқанымен, олардың тығыз жабысып қалуына байланысты бұл мүмкін болмады. Осыған байланысты лапаротомия және гастротомия әдістері арқылы хирургиялық ота жасау туралы шешім қабылданды. Нәтижесінде дәрігерлер баланың асқазанынан 105 магнитті моншақты алып шықты.

Мамандар ата-аналарға балаларын мұқият бақылап, ұсақ заттарды олардың қолы жетпейтін жерде сақтауға кеңес береді.

Отадан кейін бала реанимация бөліміне ауыстырылып, кейін хирургия бөліміне жатқызылды. Қазіргі уақытта оның жағдайы қанағаттанарлық деп бағалануда.