Алматыда 7 жасар бала көлік қағып қайтыс болды

Алматыда жол-көлік оқиғасынан 7 жасар бала көз жұмды, деп хабарлайды El.kz ақпарат агенттігі.

Қайғылы оқиға Байзақов көшесінде болған. Ауыр жарақат алған жеті жасар бала оқиға орнында қайтыс болды.

Куәгерлердің айтуынша, Jetour көлігінің жүргізушісі Байзақов көшесімен солтүстік бағытта келе жатқан. Қарасай батыр мен Бөгенбай батыр көшелерінің арасында көлік жолға кенеттен жүгіріп шыққан баланы қағып кеткен.

Алматы қаласы ПД баспасөз қызметі оқиға туралы мәлімдеме жасады:

Бұл жол-көлік оқиғасы 15:30 шамасында Алмалы ауданында болды. Jetour автокөлігінің жүргізушісі Байзақов көшесімен солтүстік бағытта қозғалып келе жатып, Бөгенбай батыр көшесінен сәл оңтүстікке қарай белгіленбеген жерден жолды кесіп өткен 7 жасар баланы қағып кетті.

Соққыдан бала жолдың қарсы бағытына ұшып кетіп, Hyundai көлігіне соғылған.

Өкінішке қарай, алған жарақаттарынан бала оқиға орнында көз жұмды. Адам өліміне әкелген жол апаты фактісі бойынша (ҚР ҚК 345-бабы, 3-бөлім) Алматы қаласы ПД Тергеу басқармасымен қылмыстық іс қозғалды, – деп хабарлады Полиция департаментінің баспасөз қызметі.