«Алматы су» департаментінің басшысы 75 млн теңгені жымқырмақ болған

«Алматы су» коммуналдық кәсіпорнының күрделі құрылыс департаментінің директоры сотталды, деп хабарлайды El.kz ақпарат агенттігі.

Антикор мәліметінше, биылғы 9 қаңтарда Алматы қаласының Бостандық аудандық соты «Алматы су» коммуналдық кәсіпорнының күрделі құрылыс департаментініңдиректоры М.Жолдыбаевқа қатысты үкім жариялады.

Ол орындалған жұмыстар актілеріне кедергісіз қол қою және қаланың кәріз жүйелерін күрделі жөндеу және сумен жабдықтау жөніндегі жұмыстарды мемлекеттік сатып алу шарттары бойынша бюджет қаражатын аудару сылтауымен кәсіпкерден 75 млн теңге жымқыруға оқталғаны үшін кінәлі деп танылды.

Жолдыбаевқа 5 жыл мерзімге коммерциялық және қаржы ұйымдарының басшылығымен байланысты қызметпен айналысуға тыйым сала отырып, шартты түрде 5 жыл бас бостандығынан айыру түріндегі жаза тағайындалды, - делінген мәліметте.

Қадағалаушы прокуратураның наразылығы бойынша Алматы қалалық сотының сот алқасының қаулысымен бірінші сатыдағы соттың үкімі өзгертілді.

Жолдыбаевқа 5 жыл мерзімге коммерциялық және қаржы ұйымдарының басшылығымен байланысты қызметпен айналысу құқығынан айыра отырып, 5 жыл бас бостандығынан айыру түріндегі жаза тағайындалды.

Сот залында сотталған адам қамауға алынды.