Аида Балаева «Ару Ана» байқауының жеңімпаздарымен кездесті

Астанада «Ару Ана» республикалық әйелдер жасаған үздік жобалар байқауының жеңімпаздары марапатталды, деп хабарлайды El.kz ақпарат агенттігі.

Халықаралық әйелдер күні қарсаңында ҚР Президенті жанындағы әйелдер істері және отбасылық-демографиялық саясат жөніндегі ұлттық комиссия төрағасы Аида Балаева «Ару Ана» республикалық үздік жобалар байқауының жеңімпаздарымен кездесті.

Байқау 2023 жылдан бастап ұлттық комиссияның қолдауымен үздік идеялар мен әлеуметтік жобаларды жүзеге асыратын әйел көшбасшыларды қолдау, біріктіру және алға жетелеу мақсатында өткізіліп келеді.

Қазақстанның барлық өңірінен байқауға 260 жоба ұсынылды. Олардың 20-сы отбасы институтын, әйелдердің экономикалық мүмкіндіктерін қолдауға, балалар құқықтарын қорғауға, инклюзивті қоғамды, креативті индустрияларды, IT, агробизнесті және қайырымдылықты дамытуға бағытталған үздік жоба деп танылды.

Аида Балаева мемлекет басшысы атап өткен әйелдің қоғам өміріндегі, болашақ ұрпақты тәрбиелеудегі маңызды рөлін айта келе, байқаудың 14 жеңімпазына сыйлықтар табыстады.

Ұлттық комиссия төрағасы бұл жобалар Қазақстанның дамуына ықпал ететініне сенім білдірді.

Үздік жобалардың қатарында әйелдер кәсіпкерлігі, инклюзивті қоғамды дамыту, инновациялар, креативті индустриялар, отбасылық тәрбие, қайырымдылық жобалары бар.