ӘЧ: Германия–Парагвай матчында сенсация тіркелді

29 маусымнан 30 маусымға қараған түні 2026 жылғы футболдан әлем чемпионатының 1/16 финалында Парагвай құрамасы Германияны жеңіп, сенсация жасады. ФРГ құрамасы футбол тарихындағы ең табысты ұлттық командалардың бірі саналса да, қатарынан үшінші әлем чемпионатында 1/8 финалға шыға алмады.

Юлиан Нагельсман негізгі құрамға Дениз Ундавты қосып, көпшілікті таңғалдырды. Топтық кезеңде «Штутгарт» шабуылшысы алаңға қосалқы құрамнан шығып, өте нәтижелі ойын көрсеткен еді. Сондықтан Германия құрамасының бас бапкері оны негізгі құрамда шығармайды деген пікір қалыптасқан болатын. Алайда 1/16 финалда немістер шабуыл шебінде Дениз Ундав пен Кай Хаверц жұбын таңдаса, Джамал Мусиала қосалқы құрамда қалды.

Парагвай құрамасында әдеттегідей қорғаныстың оң қапталында Хуан Касерес ойнады. Sofascore деректеріне сәйкес, топтық кезең қорытындысы бойынша «Динамо» клубының қорғаушысы 32 сәтті жекпе-жекпен 2026 жылғы әлем чемпионатының барлық ойыншылары арасында көш бастады. Сондай-ақ ол 16 нәтижелі доп тартып алумен бұл көрсеткіш бойынша екінші орынға ие болды.

Ойынның алғашқы минуттары қарқынды басталғанымен, кейін Парагвай Англиямен кездескен матчтағы Гана құрамасының ойынын қайталағандай әсер қалдырды. Густаво Альфароның шәкірттері қорғанысқа толық шегініп, 4-5-1 тактикалық схемасымен төмен блокта ойнады.

Немістерге бос кеңістік мүлде қалмады, сондықтан олар мүмкіндікті көбіне қапталдар арқылы іздеуге мәжбүр болды. Мануэль Нойерден басқа барлық Германия футболшылары Парагвайдың жарты алаңында жүргенімен, допқа шамамен 80 пайыз иелік еткен Нагельсман командасы қауіпті шабуылдар ұйымдастыра алмады. Тек Дениз Ундав бір сәтте жылдам гол соғуға мүмкіндік алған еді, бірақ оның дәлдікке бағытталған соққысы қақпаның жанынан зулап өтті.

Матчтың алғашқы голы бірінші таймның 42-минутында соғылды. Парагвай шабуылшысы Хулио Энсисо қапталдан келген пасты баспен дәл бағыттап, есеп ашты.

Германия екінші таймның басында, 54-минутта таразы басын теңестірді. Флориан Вирц ұзақ әрі дәл паспен Кай Хаверцті тапты, ал ол баспен допты қақпаға енгізді. Негізгі уақыт 1:1 есебімен аяқталды.

Қосымша уақыттың бірінші бөлігінде Германия 102-минутта алға шығуға мүмкіндік алды. Алайда бас төреші қорғаушы Йонатан Та соққан голды ереже бұзушылыққа байланысты есепке алмады. Қосымша уақытта да гол соғылған жоқ.

Пенальти сериясында Германия алғашқы соққысын мүлт жіберді. Кай Хаверц қарсылас қақпашысын қапы қалдыра алмады. Ал Парагвай сапынан Маурисио өз мүмкіндігін сәтті пайдаланып, командасын алға шығарды.

Кейін Германия құрамасында Йозуа Киммих пен Джамал Мусиала дәл соққы жасады. Парагвайдан Густаво Гомес пен Матиас Галарса да қателеспеді.

Төртінші соққыда екі команда да мүлт кетті: Ник Вольтемаде қақпашыны жеңе алмады, ал Антонио Санабрия допты қақпа маңдайшасынан тыс тепті.

Бесінші әрекетте Надим Амири Германияның үмітін сақтап қалды, ал Парагвай капитаны Фабиан Бальбуэна Мануэль Нойерді қапы қалдыра алмады.

Алтыншы соққыда Йонатан Та допты қақпадан асыра тепсе, Хосе Канале өз мүмкіндігін мүлт жібермей, Парагвайға жеңіс сыйлады.

Пенальти сериясының қорытынды есебі – 4:3 Парагвайдың пайдасына.

Осылайша Парагвай құрамасы 2026 жылғы әлем чемпионатының 1/8 финалына жолдама алып, Франция мен Швеция арасындағы матчтың жеңімпазымен кездеседі. Бұл ойын Қазақстан уақытымен 5 шілдеге қараған түні сағат 02:00-де өтеді.

Еске салсақ, Германия Е тобында 6 ұпай жинап, бірінші орын алған еді. Немістер Кюрасао мен Кот-д'Ивуарды жеңіп, соңғы турда Эквадордан жеңілген болатын. Ал Парагвай плей-офф кезеңіне үшінші орынмен шықты. Команда АҚШ-тан жеңіліп, Түркияны жеңді және Аустралиямен тең түсті. Нәтижесінде 4 ұпай жинады.