Абай облысындағы өрт болып жатқан аудан әкімі ауысты

Қызыл жалынға оранған Бородулиха ауданының жаңа әкімі болып Айдар Ыбраев тағайындалды, деп хабарлайды El.kz ақпарат агенттігі.

Облыс әкімінің аудан әкімдігі қызметкерлерімен кездесуі бір минуттық үнсіздіктен басталды.

Нұрлан Ұранхаев жаңа әкімді ұжымға таныстырып, әлеуетті толықтай экономиканың дамуы мен әлеуметтік-экономикалық көрсеткіштердің өсуіне жұмсау керектігін тапсырды.

Айдар Ыбраев 1979 жылдың 27 мамырында Шығыс Қазақстан облысының Күршім ауданында дүниеге келген. Шығыс Қазақстан мемлекеттік университетін тәмамдаған.

2004 жылдан бері ШҚО әкімі аппаратында түрлі қызметтер атқарған. Ұлан ауданы әкімінің орынбасары, әкім аппаратының басшысы, Жарма ауданы әкімінің орынбасары секілді қызметтер атқарған. 2022 жылдан бастап Абай облыстық мәдениет, тілдерді дамыту және архив істері басқармасының басшысы болды.