Абай облысында жүкті әйелдерге арналған пансионат ашылды

Абай облысында әлеуметтік-медициналық қолдауға мұқтаж жүкті әйелдерге арналған пансионат ашылды, деп хабарлайды El.kz интернет порталы.

Жаңа нысан ҚР Президентінің ана мен бала денсаулығын сақтау жүйесін нығайту және шалғай өңірлердегі әйелдерге медициналық көмектің қолжетімділігін жақсарту жөніндегі тапсырмаларын іске асыру шеңберінде құрылды.

Пансионат облыстық перинаталдық орталықтың базасында орналасқан және 20 төсекке есептелген. Мұнда ауылдық жерлерден келген болашақ аналар жайлы жағдайда уақытша тұруға, қажетті зерттеп-қараулардан, дәрігерлердің консультацияларынан, сондай-ақ мамандардың тұрақты бақылауымен босануға дайындықтан өтуге мүмкіндік алады.

Пансионат құрудың мақсаты - шалғайдағы және жету қиын елді мекендердегі әйелдердің жүктілік және босану қауіпсіздігін қамтамасыз ету, асқыну қаупін, сондай-ақ ана мен бала өлімінің деңгейін төмендету.