Абай облысында ағаш өңдеу кешені салынады

Абай облысында ағаш өңдеу кешені салынады. Кәсіпорынның іргетасын қалау рәсімі өтіп, оған облыс әкімінің бірінші орынбасары Ербол Садыр, «Универсал СМ» ЖШС бас директоры Жандос Тұрсынғали, «Chang Xing Group» компаниясының өкілдері қатысты, деп хабарлайды El.kz ақпарат агенттігі.

Әімдік ақпаратына сүйенсек, жоба құны 10 миллиард теңгені құрайды. Зауыт іске қосылғанда 500 жаңа жұмыс орны ашылады деп жоспарлануда. Заманауи технология бойынша экологиялық таза ағаш плиталарын, теміржол және трамвай жолдарына арналған шпалдар өндірілмек. Мұнда жылына 500 мың текше метр көлемінде ағаш материалдарын өңдеп шығару қарастырылған. 

Облыстық өңірлік үйлестіру кеңесінің шешімімен өндірістік аймақтан жер телімі бөлінді. Кешеннің алғашқы кезеңін іске қосу 2026 жылға жоспарланған. 

Кешеннің іргетасын қалау рәсімінде сөз алған облыс әкімінің бірінші орынбасары Ербол Садыр жобаның маңызына тоқталды.

Бұл - біздің облысымыз үшін және Семей қаласының дамуы үшін өте қажетті жоба. Жаңа жұмыс орындары ашылып, экологиялық таза және инновациялық технологияларды енгізуге үлкен мүмкіндік аламыз, - деді ол.