Қаңтар оқиғасы. Әкімдік ғимаратын жөндеуге 4,7 млрд теңгеге бөлінген

Талдықорғанда қаңтар оқиғасы кезінде бүлінген облыстық әкімдік ғимаратын қалыпқа келтіруге 4 млрд 758 млн теңге бөлінген, деп хабарлайды EL.KZ ҚазАқпаратқа сілтеме жасап.

Облыстық құрылыс басқармасының ҚазАқпарат тілшісіне берген мәліметінше, жөндеу жұмыстары толықтай 30 қыркүйекте аяқталуы тиіс. Ал бұл мекеменің жалпы аумағы - 9 793,9 шаршы метр, 6 қабаттан тұрады. 

Талдықорғанда қаңтар оқиғасы кезінде бүлінген екінші мекеме - қалалық полиция басқармасының ғимараты. Мұнда да жөндеу жұмыстары мекеменің іші-сыртында жүргізіліп жатыр. Ішкі жұмыстар аяқталуға жақын қалған. Ғимараттың қабырғалары сыланып, жаңадан есіктер қойылған. Ал жөндеу жұмыстарына 795 млн теңге бөлінген. Бұл ғимарат келісім-шарт бойынша 30 тамызда толықтай жөнделіп, бітуі керек. 

Сонымен қатар, шаһарда бүлікшілер қиратқан үшінші ғимарат - «Аманат» партиясының облыстық филиалының кеңсесі. 

Бұл кеңсенің үшінші қабаты өртеніп, есік-терезелері сынып, жиһаздары бүлінген. Оны қалыпқа келтіру үшін демеушілердің есебінен 219 млн теңге бөлініп, жөндеу жұмыстарының 85 пайызы аяқталды.