4 млн теңгеге дейін: Қазақстан жолдарына ең төзімді бес көлік

Көлік таңдағанда жүргізушілер көбіне сенімділікке, қосалқы бөлшектердің қолжетімділігіне және қызмет көрсету құнына мән береді. Әсіресе өңірлерде бұл факторлар ерекше маңызды. Қазақстан жолдарының жағдайын, климаттық ерекшеліктерін және екінші нарықтағы ұсыныстарды ескере отырып, ұзақ жылдар бойы өзін дәлелдеген бірнеше модельге шолу жасадық.

Chevrolet Cobalt

Chevrolet Cobalt Қазақстанда Қостанайдағы зауытта құрастырылатындықтан, елдегі ең танымал көліктердің біріне айналды. Оның 1,5 литрлік қозғалтқышы қарапайым құрылымымен және ауа райының құбылмалы жағдайына төзімділігімен ерекшеленеді. Майды уақытылы ауыстырып отырса, қозғалтқыш күрделі жөндеусіз ұзақ уақыт қызмет етеді.

Бұл модельдің басты артықшылығы – қосалқы бөлшектердің кез келген өңірде қолжетімді болуы және жөндеу құнының осы санаттағы кореялық көліктерге қарағанда арзандығы.

Астанада бүгінде 2021 жылғы, 100 мың шақырымнан астам жүрген Cobalt шамамен 4,7 миллион теңгеге сатылып жатыр. Көлік банк кепілінде болғандықтан, мәміле несие жабылғаннан кейін рәсімделеді.

Көптеген иелерінің айтуынша, көлік жанармайды үнемдейді, бөлшектері арзан әрі пайдалану кезінде сенімді қызмет етеді. Дегенмен кейбір жүргізушілер электронды басқару блогындағы ақауларға байланысты ұзақ уақыт қосалқы бөлшек күтуге мәжбүр болғанын айтады.

Nissan Maxima 3.0

Үшінші буындағы Nissan Maxima 3,0 литрлік VQ30 атмосфералық қозғалтқышының сенімділігімен бағаланады. Алты цилиндрлі мотордың ресурсы жоғары, жұмысы бірқалыпты, ал автоматты беріліс қорабы Қазақстанның қысқы жағдайында өзін жақсы көрсеткен.

Кузовы тот басуға салыстырмалы түрде төзімді болғанымен, сатып аларда табалдырықтары мен доңғалақ доғаларын мұқият тексерген жөн. Жұмсақ аспасы нашар жолдарда да жайлы қозғалысты қамтамасыз етеді.

Алматыда 1998 жылғы автоматты беріліс қорабымен жабдықталған Maxima 2,1 миллион теңгеге ұсынылып отыр.

Иелерінің пікірінше, бұл модельдің жайлылығы сол кезеңдегі Toyota мен Lexus көліктерінен кем түспейді. Әлсіз тұстары ретінде кузовтың коррозияға бейімділігі мен ескі көліктердегі электроника мәселелері аталады.

Audi A4

B6 кузовындағы Audi A4 атмосфералық қозғалтқышпен жабдықталған нұсқасы қолжетімді бағамен ұсынылатын ең сәтті неміс премиум-көліктерінің бірі саналады. Турбинасы жоқ қозғалтқыш жергілікті жанармай сапасына төзімдірек келеді.

Мамандар алдыңғы жетекті және механикалық беріліс қорабы бар нұсқаларды таңдауға кеңес береді. Олар сенімділігімен ерекшеленеді және күтімі де жеңіл.

Шымкентте 2001 жылғы дизельді қозғалтқышы бар универсал шамамен 2,55 миллион теңгеге сатылуда.

Жүргізушілер көліктің басқарылуы мен тұрақтылығын жоғары бағалайды. Алайда электроникасы мен аспа бөлігінің техникалық жағдайына ерекше көңіл бөлу қажет екенін ескертеді.

Toyota Camry 40

Toyota Camry-дің 40-шы буыны Қазақстанның екінші нарығындағы ең сенімді көліктердің бірі саналады. 2,4 литрлік қозғалтқышы мен автоматты беріліс қорабы уақытылы қызмет көрсетілген жағдайда ондаған жыл бойы күрделі ақаусыз жұмыс істейді.

Сол себепті бұл модельді такси қызметінен де, қалааралық бағыттардан да жиі кездестіруге болады.

Астанада 2007 жылғы газ-бензин жабдығы орнатылған Camry 4,5 миллион теңгеге сатылып жатыр. Сатушының айтуынша, көлікке келісімшарттық қозғалтқыш орнатылған және техникалық тұрғыдан қосымша шығын қажет емес.

Көптеген иелері Camry-дің сенімділігі мен жайлылығын атап өтеді. Дегенмен кейбір жүргізушілер қаладағы жанармай шығынының жоғары екенін және жасына байланысты ұсақ ақаулар жиілейтінін жасырмайды.

Hyundai Accent

Hyundai Accent әртүрлі буындарында ең қолжетімді әрі күтімі арзан көліктердің бірі болып қала береді. 1,5 және 1,6 литрлік қозғалтқыштары қарапайым құрылымының арқасында кез келген сервисте оңай жөнделеді.

Бұл модельдің қосалқы бөлшектері нарықтағы ең арзан бөлшектердің қатарында. Астанада Accent көліктерінің бағасы шамамен 3,5 миллион теңгеден басталады.

Иелері алты жылдан астам пайдалану кезінде тек шығын материалдарын ауыстырғанын айтады. Қозғалтқыш май жемейді, ал тасжолда сағатына 120 шақырым жылдамдықты сенімді ұстайды.

Кейбір жүргізушілер белдік кергіш ролигін бірнеше жыл сайын ауыстыру қажет екенін атап өтеді. Соған қарамастан, олар Accent-ті ұзақ жылдар бойы сенімді серік болған көлік ретінде бағалайды.