39 тоннадан астам шие экспорттаушы елге кері қайтарылды

Залалданған карантинге жатқызылған 39 тоннадан астам шие Қырғызстан еліне қайтарылды, деп хабарлайды El.kz ақпарат агенттігі.

Қырғызстанмен шекаралас аумақта орналасқан Жамбыл облысының фитосанитариялық бақылау бекеттерінде Қырғыз Республикасынан Ресей Федерациясына жіберілген шиенің транзиттік карантинге жатқызылған өніміне инспекторлар карантиндік фитосанитариялық бақылау жүргізген. Нәтижесінде шиенің карантиндік дрозофила зиянкестерінің дернәсілдерімен зақымдануының 2 жағдайы анықталған. 

Агроөнеркәсіптік кешендегі мемлекеттік инспекция комитетінің мәліметінше, жеткізушіге Әкімшілік құқық бұзушылық туралы кодекстің 400-бабына сәйкес фитосанитариялық талаптарды бұзғаны үшін әкімшілік айыппұлдар салынды. 

Еске салсақ, дрозофила — бұл кішкентай шыбындар (жеміс шыбындары), олардың мөлшері шамамен 2-4 миллиметр және салмағы екі миллиграмм. Әдетте қоңыр-сұр денелері мен қызыл көздері бар. Дернәсілдері өсімдік тектес субстраттарда дамиды. Шыбындар шіріген көкөністер мен жемістермен, ашыған ағаш шырынымен, саңырауқұлақтардың жеміс денелерімен және микрофлораға бай басқа органикалық қалдықтармен қоректенеді.