2024 жыл тарихтағы ең ыстық жыл деп танылды

2024 жыл 1850 жылдан бері жүргізіліп келе жатқан бақылаулар тарихындағы ең ыстық жыл болды, деп хабарлайды El.kz ақпарат агенттігі.

Мұндай мәліметтерді Copernicus Еуропалық қашықтықтан зондтау және Жерді картографиялау қызметі ұсынды. Орташа жаһандық температура алғаш рет индустрияға дейінгі деңгейден 1,5 градус Цельсийге асып түсті.

2024 жылы бореалдық қыс (2023 жылдың желтоқсанынан 2024 жылдың ақпанына дейін), бореалдық көктем (наурыз – мамыр) және бореалдық жаз (маусым – тамыз) өз уақыттарындағы ең жылы маусымдар болып тіркелді.

Сонымен қатар, орташа тәуліктік жаһандық температураның жаңа рекорды 2024 жылдың 22 шілдесінде орнатылып, 17,16 градус Цельсийді құрады, делінген баспасөз хабарламасында.

Болжам бойынша, 2025 жыл рекордтық жылы болмайды, бірақ бақылау тарихындағы ең ыстық үш жылдың қатарына кіреді, деп хабарлайды AFP агенттігі.