20-21 маусым күндері Қазақстанда халықаралық волонтерлер форумы өтеді

20-21 маусым аралығында Халықаралық волонтерлер форумы өтеді. Бұл туралы ҚР АҚДМ Азаматтық қоғам істері комитеті төрағасы Мадияр Қожахмет ҚР АҚДМ-нің Instagram парақшасында өткен тікелей эфирде айтты, деп хабарлайды El.kz ақпараттық агенттігі.

ҚР АҚДМ Азаматтық қоғам істері комитеті төрағасының айтуынша, қазақстандық еріктілер ішінен «Халықаралық волонтерлар форумына» 80 адам қатысады.

Барлық еріктілерді шақыру мүмкін емес. Осы салада көп жылдан бері еңбегін сіңіріп келе жатқан жергілікті волонтерлардың ішінен конкурс өткізіп, 80 адамды іріктеп алдық. Форумға әр өңірден 4 ерікті қатысуға мүмкіндік алды, - деді  Мадияр Қожахмет.

Жалпы, іс-шараға 400-ден аса қонақ қатысады.

200-ден астам қазақстандықтар мен 100-ден аса әлемнің түкпір-түкпірінен келген халықаралық волонтерлер қатысады. Осы тізім аясында, Біріккен ұлттар ұйымы жанындағы волонтерлік бағдарламаның атқарушы директоры Тойли Курбанов келеді деп жоспарланып отыр, - деді комитет төрағасы.