«Берел» мұражай-қорығы: Өткен ғасырға саяхат

Шығыс-Қазақстан облыстық Қазақстан халқы ассамблеясы этномәдени бірлестіктердің белсенді жастары өздерін бір мәрте тарихшы сезінуге мүмкіндік алды. Өскемен, Семей, Риддер және Алтай қалаларынан жиналған жастар шығыстың шырайлы жерлеріне саяхаттап, тарихи-мәдени орындарға сапар шегіп қайтты.

«Берел» мемлекеттік тарихи-мәдени мұражай-қорығы қонақтарды жылы қарсы алып, аймақ бойынша экскурсия жүргізілді. Танымдық сапарды білікті маман Жәния Сегізбаева бастап, аспан астындағы тарихи ескерткіштермен етене жақын таныстырды.

Жастар тек көзбен ғана көріп қоймай, құнды жәдігерлерді нағыз археологтар секілді зерттеу мүмкіндігіне ие болды. Олар Берел даласында тарихтан сыр шертер орындарда жүріп, өткен ғасырға сапар шекті.

Ұйымдастырушылардың ақпараты бойынша, іс-шараның мақсаты – жастарға туған өлке тарихын дәріптеу, Шығыс Қазақстан жерін мекендеген ұлт өкілдерінің тұрмыс-тіршілігі мен мәдениетін таныстыру, тарихи-мәдени орындардың ел тарихы үшін маңыздылығын түсіндіріп, ескерткіштер мен жәдігерлерді қастерлеп, сақтауға үйрету.