Абай облысындағы Бесқарағай ауданында 300 орындық мектеп ашылды

Абай облысындағы Бесқарағай ауданында 300 орындық мектеп пайдалануға берілді. «Жайлы мектеп» ұлттық жобасы аясында салынған білім ордасының ашылу салтанатына облыс әкімі Берік Уәли қатысты, деп хабарлайды El.kz ақпарат агенттігі.

Мектепте оқушылардың жан-жақты білім алуына барлық жағдай жасалған. Заманауи жабдықтармен қамтамасыз етілген оқу орнында 57 мұғалім еңбек етеді. 22 оқу кабинеті, мультимедиалық және жаратылыстану-ғылыми пәндерге арналған зертханалар, спорт және шығармашылық үйірмелері жұмыс істейді. 120 орындық асхана, 100 орындық мәжіліс залы, интерактивті панельдер, пәндік кабинеттер, кітапхана, оқу залы бар. Спортпен шұғылдануға арналған залдар мен ашық алаңдар, воркаут аймақтары, домбыра үйірмесі сияқты қосымша білім беру бағыттары қарастырылған.

Облыс әкімдігінің мәліметінше, оқу ұясында ерекше білім беру қажеттіліктері бар балаларға арналған инклюзивті орта да ескерілген: пандустар, тактильді жолдар, арнайы санитарлық тораптар орнатылған.

Аймақ басшысы мектептің ашылу салтанатында сөйлеген құттықтау сөзінде білім ордасының Бесқарағай ауылының тұрғындары үшін маңызы зор екенін атап өтті.

Мемлекет басшысы атап өткендей, әрбір оқушының сапалы білім алуына мемлекет тарапынан қазіргі таңда барлық жағдай жасалып жатыр. «Жайлы мектеп» жобасы ел игілігіне, білім мен ғылымды шыңдауға бағытталған бағдарлама. Бүгін, міне, облысымызда екі бірдей жаңа мектеп пайдалануға берілді. Бұл оқушылар үшін, ата-аналар үшін, мұғалімдер үшін үлкен мереке, айтулы күн. Біз бұл бағыттағы жұмысты жалғастырамыз. Өңірдегі мектептер кезең-кезеңмен жаңғырып, жаңартылады, - деді облыс әкімі.

Айта кетейік, аудан орталығындағы Қайрат Рысқұлбеков атындағы орта мектептің оқушылары бұған дейін балабақшаға бейімделген ғимаратта оқып келген еді. Енді олар жаңа мектепке білім алады. 

Бөлісу:

0 0 0 0 0

Қысқа да нұсқа. Жазылыңыз telegram - ға