Сөмке жасауға 600 метр жіп, ал оны безендіруге 15 мыңнан астам кристалл қажет болуы мүмкін. Bvlgari 2027 жылдың көктем-жаз маусымына арналған жаңа топтамасында аксессуар жасауды зергерлік өнермен ұштастырған.
15 мың кристалл қолданылған сөмке
Жаңа топтаманың ерекшелігі де осында. Дизайнерлер Bvlgari-дің зергерлік бұйымдарынан жақсы таныс жылан бейнесін, Tubogas элементтерін және асыл тастарға тән реңктерді сөмкелерге көшірген. Ал кей модельдерді әзірлеу бірнеше күнге созылатын қол еңбегін қажет етеді.
Топтамадағы ең күрделі жұмыстардың бірі – Galaxy Crystals өрнегімен безендірілген Serpenti Forever Mini Top Handle.
Бір сөмкеге 28 реңктегі 15 мыңнан астам кристалл қолданылады. Соның шамамен 1 900-і сөмке толық құрастырылғаннан кейін қолмен бекітіледі.
Serpenti Cuoricino клатчының кешкі нұсқасына да 4300-ден астам Swarovski кристалы қажет. Оның мыңға жуығын шеберлер дайын бұйымға жеке-жеке орналастырады.
600 метр жіп және 15 күндік жұмыс
Кристалдан бөлек, Bvlgari кесте өнеріне де басымдық берген. Lotus Garden деп аталатын өрнек жіп, рафия, кристалл және інжуден жасалады. Serpenti Forever Medium моделінің бір данасына шамамен 1100 кристалл мен інжу және 20 метр түрлі-түсті рафия жұмсалады. Оны безендіруге он күн қажет.
Ал Serpentine Tote бұдан да көп еңбекті талап етеді. Бір сөмкеге шамамен 600 метр жіп пен 900 сәндік элемент пайдаланылады. Кесте тігу мен әшекейлеу жұмыстарының өзі 15 күнге созылады. Lotus Garden Embroidery нұсқалары 2027 жылдың сәуірінде сатылымға шығады.
Сөмкенің тұтқасына айналған жылан
Bvlgari-дің басты символдарының бірі – Serpenti жаңа топтамада тек әшекей ретінде қалмаған.
Serpenti 1968 моделінде жылан бейнесі сөмкенің тұтқасына айналған. Металдан жасалған бұл бөлшекті шешіп, орнына ірі Cobra тізбегін тағуға болады.
Модельдің түпкі идеясы Bvlgari-дің 1968 жылғы зергерлік сағаттарымен байланысты. Serpenti 1968 сатылымға 2027 жылдың ақпанында шығады.
Жылан бейнесі жүрек пішініндегі Serpenti Cuore 1968 моделінде де жалғасқан. Оның тұтқасындағы эмаль қолмен жағылған. Сөмке Almandine Garnet және Pink Petalite реңктерінде ұсынылады.
1970-жылдардағы дизайн қайта оралды
Bvlgari жаңа модельдермен шектелмей, мұрағатына да қайта үңілген. Соның бірі – алғаш рет 1970-жылдары жасалған Melone Clutch.
Қауын пішінінен шабыт алған клатч бұл жолы алтын түсті әрлеуі бар бүрмелі алюминийден жасалған. Ілгегіне ақ інжу қабыршағы орнатылып, сөмкеге ауыстырып тағуға болатын екі жібек шашақ қосылған. Қосымша тағы 12 түске тапсырыс беруге мүмкіндік бар. Melone Clutch 2026 жылдың қазанында сатылымға шығады.
Зергерлік бұйым мен сөмкенің арасы жақындады
Жаңа маусымда Serpenti Forever желісі де жаңарған. Medium Top Handle геометриялық пішінге ие болса, Medium Shoulder Bag көлденеңінен ұзартылған. Кей модельдер пастель реңктегі карунга су жыланының терісінен жасалған.
Tubogas Sphere моделінде де сән үйінің зергерлік тарихына сілтеме бар. Қою Almandine Garnet түсті сөмкенің алтын түстес тұтқасы эмаль және кристалдармен көмкерілген.
Осылайша Bvlgari жаңа топтамада сөмкенің пішінін өзгертумен ғана шектелмеген. Негізгі назар материалға, қолмен жасалатын декорға және брендтің зергерлік мұрасын аксессуарға бейімдеуге аударылған. Нәтижесінде кей сөмкені безендіруге бірнеше мың кристалл мен жүздеген метр жіп жұмсалып, жұмыс екі аптаға дейін созылады.
