Үкімет отырысында экология және табиғи ресурстар министрі Ерлан Нысанбаев коммуналдық және өнеркәсіптік қалдықтарды басқарудың жай-күйі мен алдағы жоспар туралы баяндама жасады, депхабарлайды El.kz ақпарат агенттігі.
Министр өнеркәсіптік қалдықтар бойынша жыл сайын республикада шамамен 1 миллиард тонна қалдықтар түзілетінін айтты.
Былтырдан бастап министрлік қалдықтарды жинау және қайта өңдеу кәсіпорындарын ынталандыру мақсатында «ЭкоҚолдау» бағдарламасын қайта іске қосты. Биыл осы төлемдерге 9,2 миллиард теңге қарастырылды. Мысалы, полимер қалдықтарының жиналған және қайта өңделген әр тоннасы үшін биылғы төлемдер сомасы 71 мың теңгеден асады. Бұдан бөлек біз қалдықтарды қайта өңдеудің меншікті жүйесі бар өндірушілер мен импорттаушыларды утильалым төлеуден босату талаптарын жеңілдеттік, – деді Ерлан Нысанбаев.
Үкімет басшысы Олжас Бектенов полигондардың 20 пайызы ғана тиісті талаптарға сай келетінін айтты. Министр Ерлан Нысанбаев бұл мәселе бойынша 2020 жылдың соңында Үкімет кешенді іс-шара жоспарын бекіткенін, онда 100 жаңа полигон салу қарастырылғанын жеткізді.
Бүгінгі күні өңірлермен 100 жаңа полигон салу жоспарының аясында 7 полигон салынып, іске қосылды. 23 полигонның құжаттамасы әзірленді. 18-і әлі әзірленуде, ал 52 полигон бойынша өңірлерге биылғы қаражат қарастырылып, құжаттамасын әзірлеуге кірісу керек. Одан тыс полигондардың экологиялық кодекске сәйкес келмейтін бірден-бір себебі - қала мен ауылдық елді мекендерді бөлмей, бір талап болу. Өйткені ауылдық мекендерге талаптарға сәйкес қыруар қаражат керек. Экологиялық кодексте бұл талаптарды жеңілдету қарастырылған, – деді Нысанбаев.
Бұдан өзге полигондарға утиль төлем есебінен қаржыландыру қарастырылу көзделіп отырғанын айтты. Осы ретте премьер-министр Олжас Бектенов бұл бағытта жұмыс баяу жүріп жатқанын, ауыз толтырып айтатындай нәтиже жоқтығын, әкімдіктердің жұмысын министрлік тарапынан дұрыс үйлестіру керек екенін, министрліктің осы бағытта дұрыс ұстанымы болу қажетін айтты.
Қысқа да нұсқа. Жазылыңыз telegram - ға
