Жыл басынан бері 7,4 млн шаршы метр баспана пайдалануға берілді
2024 жылдың 6 айындағы статистикалық мәліметтер бойынша 7,4 млн шаршы метр баспана пайдалануға берілді, деп хабарлайды El.kz ақпарат агенттігі.
Өнеркәсіп және құрылыс министрлігінің мәліметінше, былтырғы 15,5 млн шаршы метр тұрғын үй 18 млн шаршы метрге ұлғайған.
2024 жылы қаржыландырудың барлық көздерінен тұрғын үйді пайдалануға беру жоспары 15,5 миллион шаршы метр тұрғын үй немесе 145 мың отбасы деңгейінде белгіленді. Статистикаға сәйкес, 2024 жылдың қаңтар-маусым айларының деректері бойынша 7 440,5 мың шаршы метр тұрғын үй пайдалануға берілді, бұл 2023 жылдың кезеңімен салыстырғанда 101% құрайды. Оның 6 887,1 мың шаршы метрі жеке меншік пен халық есебінен енгізілген, - делінген мәліметте.
Республика бойынша барлығы 67 498 тұрғын үй пайдалануға берілді, оның 16 101-і – жеке тұрғын үйлер.
Мемлекеттің бірінші кезектегі міндеттерінің бірі – халықтың ең мұқтаж, әлеуметтік осал топтарын және су тасқынынан зардап шеккендерді баспанамен қамтамасыз ету. Қазіргі уақытта әкімдіктерде тұрғын үй кезегінде 651 677 адам тұр, оның 256 572-сі халықтың әлеуметтік осал топтары.
Тұрғын үй-коммуналдық инфрақұрылымды дамытудың 2029 жылға дейінгі қабылданған тұжырымдамасы шеңберінде аса мұқтаж жандардың тұрғын үй мәселелерін шешу үшін мынадай шаралар қарастырылған:
- Астана, Алматы және Шымкент қалаларында халықтың әлеуметтік осал топтары, көп балалы отбасылар және жұмыс істейтін жастар үшін сатып алу құқығынсыз 32 350 жалдамалы пәтер сатып алу.
- 2024 жылы халықтың әлеуметтік осал топтары үшін сатып алу құқығы бар және құқығы жоқ 22 202 жалдамалы пәтер сатып алу жоспарлануда.
- Жеңілдікті ипотекалық бағдарламалар (2-10-20, 5-10-20). Соңғы 5 жылда «Отбасы банкі» арқылы 5 пайыздық мөлшерлемемен 53 088-ден астам несие берілді.
Сонымен қатар, су тасқынынан зардап шеккен 19 342 үйді қалпына келтіру жұмыстары жүргізілуде, оның ішінде жалғыз тұрғын үй деп танылған 7 386 саяжай. Тұрғын үй комиссиясының техникалық тексеру қорытындысы бойынша келесідей қолдау көрсету туралы шешім қабылданды:
- 2578 тұрғын үй нысанының құрылысы.
- Жылжымайтын мүлік нарығында 6000 тұрғын үйді сатып алу.
- 9243 нысанның жөндеу жұмыстары.
Бүгінгі күні 2578 үйдің құрылысы басталып, 205 үйдің құрылысы аяқталды (Солтүстік Қазақстан облысы - 200 үй, Павлодар облысы - 5 үй), зардап шеккен азаматтар қоныстандырылды, 3919 үй сатып алынды және 6236 үй жөндеуден өтті.
Қазақстан Республикасы Үкіметінің 2024 жылғы 12 сәуірдегі қаулысымен Қостанай облысы Арқалық қаласында зардап шеккен 31 отбасына үй сатып алуға Үкіметтің төтенше резервінен 405 миллион теңге бөлінді.
Қысқа да нұсқа. Жазылыңыз telegram - ға