Илон Маск Twitter-ды сатып алғаннан кейін платформаны қайта құру бағытында бірқатар түбегейлі өзгерістер енгізіп келеді. Алдымен бренд атауын X деп өзгерткен кәсіпкер енді тікелей хабарламалар (DM) функциясын толығымен алып тастауға шешім қабылдады. Бұл өзгеріс X-тің әлеуметтік желі ретінде ғана емес, байланыс платформасы ретінде де жаңа бағытқа бет бұрғанын көрсетеді.
X-тің жаңа саясаты – қолданушыны әлеуметтік лента шеңберінен шығарып, экожүйелік платформаға көшіру. Яғни X енді жаңалықтар мен посттармен ғана шектелмей, қолданушылардың күнделікті байланыс, жұмыс, медиа және қаржы процестерінің бәрін қамтуды көздейді. Бұл ретте XChat басты құрал болмақ.
DM функциясы жойылады
X платформасында жұмыс істейтін кейбір инженерлер мен сенімді ақпарат көздері хабарлағандай, жақын арада DM (Direct Message) бөлімі толық жойылады. Мұны X-тағы қолданушылардың бірі хабарлама сұраныстарындағы ақаулар туралы пікір білдірген кезде, компания инженері Зак Варунек ресми түрде растаған.
«Жоқ, бұл тек сұраныс емес, жалпы барлық DM жақында толығымен өшіріледі»
— Зак Варунек, X бағдарламашысы
Бірақ хабарламалар мүлде жоғалмайды
Бұл өзгеріс платформадан барлық жеке хат алмасулар алынып тасталады дегенді білдірмейді. Керісінше, DM орнына XChat деп аталатын жаңа жүйе енгізілмек. Қазіргі уақытта бұл жаңа жүйе кейбір қолданушылармен ішкі түрде тестілеуден өтіп жатыр.
XChat туралы жаңа ақпарат
XChat — бұл X платформасының ішіндегі жаңа байланыс құралы, ол әлеуметтік медиа мен жеке хат алмасу функцияларын біріктіреді. Қолданушыларға жеке чаттар, топтық әңгімелер және мультимедиа хабарламалары жіберу мүмкіндігін береді. XChat жүйесі қарапайым әрі қауіпсіз болуы үшін шығарылатын жаңартуларға қосымша шифрлау әдістері енгізілуі мүмкін. Сонымен қатар, XChat жүйесінде интерактивті мүмкіндіктер де болады, бұл қолданушылардың бір-бірімен көбірек байланыс орнатуына мүмкіндік береді.
XChat-тің басты ерекшелігі — бұл жаңа жүйенің басқа әлеуметтік медиа платформаларынан айырмашылығы, оның тұрақты және бейтарап жұмыс істейтін байланыс құралын ұсынуы. Осылайша, XChat тек хабарламаларды жіберумен ғана шектелмей, жаңа формадағы байланыс түрін ұсынып, әлеуметтік медиа мен хабар алмасудың жаңа белесін қалыптастыруды көздейді.
Илон Маск пен X платформасының бұл қадамы әлеуметтік медиадағы жеке байланыс жүйесіне жаңа көзқарас әкелуі мүмкін. Дәстүрлі DM-нің орнына XChat-тің келуі X-ті тек жаңалықтар лентасы емес, толыққанды байланыс құралына айналдыруды көздейді. Егер бұл өзгеріс сәтті жүзеге асса, X өзінің қолдану аясын айтарлықтай кеңейтіп, жаңа аудиторияны тартуы әбден мүмкін.
Қазақстанда XChat-тің болашағы қандай?
Елімізде X (бұрынғы Twitter) платформасын ай сайын қолданатын белсенді аудитория саны 2023 жылдың соңындағы деректер бойынша 150-200 мың шамасында. Бұл Instagram немесе TikTok-пен салыстырғанда әлдеқайда төмен. Дегенмен, саясат, ІТ, халықаралық жаңалықтар мен медиа саласына қызығушылық танытатын аудитория үшін бұл платформа әлі де маңызды.
XChat енгізілуі — Қазақстандағы X қолданушылары үшін жаңа кезеңнің бастауы болуы мүмкін. Егер бұл жүйе қарапайым әрі жылдам жұмыс істейтін болса, әсіресе медиа, стартап, SMM және ІТ саласындағы кәсіби пайдаланушылар арасында сұранысқа ие болуы ықтимал.
Сонымен қатар, егер XChat қазақ тіліне бейімделген нұсқасын ұсынса, бұл аймақтық аудиторияның қызығушылығын арттыра түседі. Қазақша интерфейс, ыңғайлы аударма жүйесі және жергілікті қауымдастықтармен байланыс мүмкіндігі — XChat-тің Қазақстандағы табысын айқындайтын басты факторлар болмақ.
Жалпы алғанда, XChat — байланыс пен әлеуметтік медианың шекарасын жоятын, біртұтас экожүйеге жол ашатын жаңа бастама. Қазақстандағы қолданушылар бұл жаңалыққа бейімделсе, X еліміздегі медиа және коммуникация кеңістігінде жаңа орнын табуы мүмкін.
Аршат Ораз
Қысқа да нұсқа. Жазылыңыз telegram - ға
Оқи отырыңыз 
