Таңда көңілді оянып, күні бойы сергек жүру – әр адамның арманы. Бірақ көпшілік таңертең төсектен тұруды қиынсынып, өзін шаршаңқы сезінеді. Мұндай жағдайды болдырмау үшін бірнеше қарапайым әдетті қалыптастыру жеткілікті, деп жазады El.kz интернет порталы.
Алдымен ұйқы тәртібін дұрыс жолға қойған жөн. Күн сайын бір уақытта ұйықтап, бір уақытта тұру ағзаның биологиялық сағатын реттейді. Ересек адамға 7–8 сағат ұйқы жеткілікті, ал ұйқының тапшылығы таңертеңгі сергектікті ең алдымен бұзады.
Ұйықтар алдында гаджеттерді көп қолданбаған дұрыс. Экраннан бөлінетін көк жарық миға «әлі күндіз» деген белгі береді де, ұйқының терең сатысына көшуге кедергі келтіреді. Оның орнына кітап оқып, тыныш әуен тыңдаған пайдалырақ.
Таңертеңгілік жаттығу да сергектік сыйлайды. Қарапайым созылу, жеңіл қозғалыстар немесе бірнеше минуттық жаттығулар қан айналымды жақсартып, энергияны арттырады. Сонымен бірге бөлмені таза ауамен желдету де жақсы әсер береді.
Су ішу – тағы бір маңызды қадам. Түнгі ұйқыдан кейін ағза сұйықтықты қажет етеді. Бір стақан су ішкен соң ғана ас қабылдаған дұрыс. Ал таңғы ас дәруменге бай, жеңіл әрі құнарлы болғаны абзал.
Көңіл-күйді көтеру үшін ойға жағымды жоспар құрып, шағын мақсаттар қойған жөн. Күніңізді жақсы бастау – күні бойғы белсенділік пен өнімділіктің кепілі.
Қорытындылай айтқанда, дұрыс ұйқы, дене белсенділігі, пайдалы тамақтану және позитивті ой – таңды көңілді қарсы алып, күні бойы сергек жүрудің басты кілті.
Қысқа да нұсқа. Жазылыңыз telegram - ға
Оқи отырыңыз 
