Қазіргі кезде спортзалға баруға уақыты немесе мүмкіндігі жоқ адамдар үшін үй жағдайында жаттығу жасау — ең тиімді шешімнің бірі. Үйде спортпен айналысу денсаулықты жақсартып қана қоймай, адамның өзін жақсы сезінуіне, көңіл күйін көтеруге және иммунитетін күшейтуге көмектеседі. Ең бастысы — тұрақтылық пен өз тәртібіңді сақтау, деп жазады El.kz интернет порталы.

Ең алдымен жаттығуға арналған ыңғайлы бұрыш немесе шағын кеңістік дайындау қажет. Ол жер таза, желдетілетін және қозғалысқа кедергі келтірмейтін болуы тиіс. Егер мүмкіндік болса, йога төсенішін, гантель немесе резеңке таспа (эспандер) секілді қарапайым құралдар алу пайдалы. Арнайы жабдық болмаса да, өз салмағыңмен орындалатын жаттығулар (отырып-тұру, итеріліп көтерілу, пресс, планка) дене қалыпқа келтіруге жеткілікті.

Күн тәртібін дұрыс құру — тұрақтылықтың кілті. Жаттығу уақытын белгілеу және оны күн сайын сол уақытта орындау ағзаға әдет қалыптастырады. Көптеген мамандар таңертеңгі немесе кешкі уақытта 30–60 минут жаттығу жасауды ұсынады. Уақыт аз болса да, жүйелілік сақталса, нәтиже айқын көрінеді.

Мотивацияны жоғалтпау үшін жаттығу бағдарламасын түрлендіріп отырған дұрыс. Бір күні күшке бағытталған қозғалыстар жасалса, келесі күні кардио немесе созылу жаттығулары орындалсын. Музыка тыңдап немесе бейне-нұсқаулықпен бірге жаттығу да қызығушылықты арттырады.

Тамақтану мен ұйқы да спорт нәтижесіне тікелей әсер етеді. Ағзаға жеткілікті су мен дәрумендер керек, ал дұрыс тамақ пен толыққанды ұйқы бұлшықеттің қалпына келуін жылдамдатады. Егер жаттығудан кейін шаршау байқалса, демалыс күні қалпына келуге мүмкіндік бер.

Ең бастысы — өзіңе сену және басталған істі тоқтатпау. Үй жағдайындағы тұрақты жаттығулар адамды жинақылыққа, ерік-жігерге тәрбиелейді әрі дене мен ойды сергітеді. Күн сайынғы кішкентай қадамдар үлкен нәтижеге жеткізеді.