Футболды гол мен пастан ғана тұратын спорт түрі деп санау қателік. Футбол дегеніміз – жанкүйерді сендіру, жүректі тебіренту, миллиондаған адамға шабыт сыйлау. Бір кездері «жарақаттан көз ашпайды», «тәртіпсіз», «бейнеойынға берілген» деп сынға қалған Усман Дембеле бүгінде әлемдік футболдың ең биік шыңына шықты. Париждің қақ жүрегіндегі әйгілі Шатле театрында ол «Алтын допты» қолына алып, көз жасына ерік берді. Бұл сәт еңбек пен есеюдің әділ жемісі еді.
Жас баладан – көшбасшыға
Дембеле «Реннде» жарқырап, «Боруссияда» жұлдыз болып, «Барселонаға» рекордтық 105 миллион еуроға ауысқанда, бәрі одан ғажайып күтті. Бірақ жарақаттар, тәртіп мәселесі, пицца мен ойын приставкасына деген тәуелділік жанкүйерлердің үмітін су сепкендей басты. Ол кезде көпшіліктің көзіне Усман жауапкершіліктен қашқан «ерке бала» болып көрінетін.
Бірақ уақыт оның мінезін шыңдады. 2021 жылы Хави «Барсаға» келген соң Дембеле түбегейлі өзгерді: денсаулығына мән беріп, ойын тәртібін жолға қойды, алаңда тұрақтылыққа қол жеткізді. Ол тек талантты ойыншы ғана емес, еңбек пен төзімділіктің символына айналды.
Жаңа биік – ПСЖ
2023 жылы ПСЖ-ға ауысқан Дембеле жаңа деңгейге шықты. Киллиан Мбаппе кеткен соң, шабуыл шебінің ең тәжірибелі ойыншысы ретінде команданы соңынан ертті. Эгоизмге толы финтші емес, тактикалық жүректі «жалған тоғыздық» болып ойнаған нағыз көшбасшы қалыптасты.
Цифрлар мен марапаттар
Өткен маусымда Усман 37 гол соғып, 16 нәтижелі пас берді;
Чемпиондар лигасын, Франция чемпионатын, Кубок пен Суперкубокты жеңіп алды;
Ұлттар лигасында Францияға қола сыйлады.
Мұндай статистика кез келген футболшының мансабын алтын әріппен жазары сөзсіз.
Әділет салтанаты
Тізімде биылғы «Алтын доп» үшін басты қарсылас – 18 жастағы Ламин Ямаль болды. Ол да ерекше ойын көрсетті, бірақ тәжірибелі Дембеленің тұрақтылығымен салыстыруға келмейді.
Қорытынды
Футбол – ұжымдық өнер. Дембеленің «Алтын добы» – жеке шеберлік пен командалық еңбектің бірлігінің айғағы. Усман ПСЖ-ны Еуропаның шыңына көтерді, ал ПСЖ оған әлемнің үздік ойыншысы атануға көмектесті.
Бір кездері көпшіліктің көңілі қалған Дембеле бүгінде нағызға лидерге айналды. Күдік пен сыннан басталған жол ақыры «Алтын допқа» жеткізді. Бұл – футболдағы ең әдемі әділдіктің көрінісі.
Қысқа да нұсқа. Жазылыңыз telegram - ға
Оқи отырыңыз 
