Ұшатын такси, робобас пен электрокар: Гуанчжоудың технологиялық мүмкіндіктері
Қытай елшілігінің ұйымдастыруымен жүзеге асқан медиа тур аясында қазақстандық бір топ журналист келесі қалаға ат басын бұрдық. Қытайдың саяси-экономикалық, ғылым мен техниканың, мәдениет пен білімнің орталығы саналатын – Гуанчжоу қаласына бардық. 20 миллионға жуық халқы бар мегаполистің тұрмыс-тіршілігімен танысып, қалада жүзеге асып жатқан инновациялық технологияларға куә болдық.
Өздігінен ұшатын әуе таксилер
Гуанчжоу қаласында ұшқышсыз ұшатын дрон-таксилерді шығарумен айналысатын EHang Holdings Limited компаниясы шоғырланған. 2014 жылы негізі қаланған компания бүгінде «ұшатын такси» шығаруды жолға қойған әлемдегі көшбасшы компаниялардың қатарында.
Компания қауіпсіз, интеллектуалды және экологиялық қауіпсіз көлік түрін шығаруды мақсат еткендіктен шет мемлекеттерден сұраныс жоғары. Жолаушы таситын әуе-таксилері, өрт сөндірушілер және зат тасымалдаумен айналысатын дрондар да бар.
EHang Қытайдың Азаматтық авиация әкімшілігінің арнайы сертификатына ие болған. Бұл дегеніміз – азаматтар үшін қауіпсіз дегенді білдіреді. Аньхой провинциясының Хэфэй қаласының әкімдігі ішкі туризмді дамыту үшін осындай әуе таксилерінің 100 шақтысын сатып алған. Мұндай әуе көлігінің арнайы қуатталатын тұрағы болады. EHang 216-S әуе таксиінің салмағы – 650 келі. Электр энергиясымен қозғалып, сағатына 130 шақырымға дейін ұшады. Қазіргі құны 2 миллион 390 юаньды құрайды.
EHang компаниясының миссиясы – автономды ұшатын аппараттардың әлеуетін тиімді пайдаланып, логистика саласында тиімді әрі тұрақты шешімдер ұсыну. Қала ішіндегі көлік кептелісін азайтып, тұрғындар мен туристер қажеттілігін толықтай өтеуге қауқарлы.
EHang инновациясының негізі – автономды ұшу жүйелері мен интеллектуалды басқару платформалары. Компанияның негізгі өнімі – EHang 216-S, жолаушылар мен жүктерді тасымалдауға қабілетті екі адамға арналған әуе таксиі. Ол қысқа және орта қашықтыққа ұшуға арналған және толықтай автономды, яғни жолаушылардың қандай да бір тәжірибесі болуы міндетті емес. Ұшақ озық басқару жүйесі арқылы жұмыс істейді, операторлар орталықтан ұшу операцияларын бақылап, әуе кеңістігін басқара алады.
EHang216-S ұшу кезінде қауіпсіздік пен сенімділікті қамтамасыз ететін бірнеше резервтік жүйелермен жабдықталған. Оның электр қозғалтқышы да экологияға қауіпсіз, жаһандық тенденцияларына сәйкес келеді.
Гуанчжоудан бөлек Дубайда да EHang216-S дроны сәтті қолданысқа енгізілген. Жолаушылар тасымалынан бөлек, компанияның Falcon сериясындағы автономды жүк дрондары тауарларды қалалық және ауылдық аймақтарда жеткізуге арналған. Бұл дрондар дәстүрлі жерүсті жеткізу әдістеріне қарағанда жылдам, үнемді және экологиялық таза балама ұсынады.
EHang-тың логистикалық шешімдері электрондық коммерция, медицина дәрі-дәрмекті жеткізу және өнеркәсіптік тасымалдау сияқты салаларда маңызды рөл атқарады деп күтілуде.
Сонымен қатар көлік және логистикадан тыс аэрошешімдер ұсыну көзделіп отыр. Компанияның дрондары төтенше жағдайларда іске көшіп, инфрақұрылымды бақылау және қоршаған ортаны қадағалау сияқты салаларда қолданылады. Мысалы, дрондарды электр желілерін, көпірлерді және басқа да маңызды инфрақұрылымдарды тексеру үшін пайдаланып, қол еңбегіне деген қажеттілікті азайтып, қауіпсіздікті арттыруға болады.
53 секундта көлік шығаратын зауыт
Гуанчжоу қаласындағы келесі нысан - Guangzhou Aion New Energy Automobile компаниясы. Заманауи электромобиль шығаруға(Nev) маманданған әйгілі қытайлық автомобиль өндірушісі. Gac Group-тың (Guangzhou Automobile Group Co.) еншілес кәсіпорны ретінде құрылған. Aion озық технологияларды, жоғары өнімділікті және экологиялық таза шешімдерді ұсынатын электромобильдерді (Ev) әзірлеуге және өндіруге бағытталған.
Көлік шығаратын зауыттың өндіріс бөлігіне өткенде электрокардың қалай құрастырылатынын өз көзімізбен көрдік. Зауытта әрбір қызметкердің өз міндеті бар. Яғни, әр қызметкер өзіне тиесілі автобөлшекті орнатып отырады. Тіпті, көлік терезелерін қоюмен айналысатын арнайы роботтар да жұмыс істеп тұр. Соңында дайын болған көлікті жүргізіп, сынақтан өткізіп көреді. Көлік құрастыруда қолданылатын бөлшектердің барлығы Қытайда шығарылған. Таза отандық өнім.
Aion компаниясы жеке және коммерциялық пайдалануға арналған электромобильдердің кең ассортиментін қамтиды. Компанияның көліктері инновациялық мүмкіндіктерімен, озық технологияларымен және басқаруға ыңғайлы тетіктерімен танымал. Кейде көлікті тұраққа қою немесе ұзақ жолға шыққанда автономды режимде өздігінен басқарылады.
WeRide – робобастардың мекені
Шанхайда жүргізуісіз жүретін автобустарды сынақтан өткізетін орталықта болған едік. Ал Гуанчжоуда осындай робобастар қала тұрғындарын тасымалдап жүр. WeRide – Гуанчжоудағы өздігінен жүретін, автономды басқарылатын қоғамдық көліктерді шығаратын компания. Компания 2017 жылы құрылған. Өзін-өзі басқару технологияларын әзірлеуге және енгізуге маманданған. Компания өзінің озық автономды жүргізу жүйелері арқылы қауіпсіз, тиімді және ЖИ арқылы басқарылатын интеллектуалды көлік түрлерін шығаруды көздейді.
Қазіргі таңда компания қоғамдық көліктерден бөлек қала ішінде қатынайтын таксилерді де шығаруды мақсат етіп отыр.
WeRide үшін қауіпсіздік - басты басымдық. Компания автономды көліктерінің сенімділігі мен қауіпсіздігін қамтамасыз ету үшін қатаң сынақтар мен валидация процестерін ұстанады. WeRide автономды жүргізу операциялары үшін қажетті құқықтық және қауіпсіздік стандарттарына сай болу үшін реттеуші органдармен ынтымақтасады.
Робобастар сағатына 40 шақырым жылдамдықпен жүреді. Қалада 50 шақты автобус тұрғындарды тасымалдап жүр.
WeRide - көліктің болашағын қалыптастыру үшін озық технологиялар мен инновацияларды қолдана отырып, автономды жүргізу индустриясының негізгі ойыншысы. Қауіпсіздікке, тиімділікке және интеллектуалды ұтқырлық шешімдеріне назар аудара отырып, WeRide автономды жүргізудің эволюциясына және кеңірек автомобиль ландшафтына айтарлықтай әсер ету үшін жақсы орынға ие.
Қысқа да нұсқа. Жазылыңыз telegram - ға