Ұлттық қорғаныс университетінің ғылыми взводы әскери ант берді
Әскери-ғылыми взводтың, сондай-ақ күзет және қамтамасыз ету ротасының сарбаздары Отанға адал болуға салтанатты түрде серт етті, деп хабарлайды El.kz ақпарат агенттігі.
Әскери-ғылыми взводқа еліміздің жетекші азаматтық жоғары оқу орындарын өзекті мамандықтар бойынша бітірген Астана, Алматы және Қарағанды қалаларынан 6 жас таңдап алынды. Өзінің күнделікті қызметінде бұл бөлімшенің әскери қызметшілері робототехника, IT-технологиялар, 3D принтердегі заманауи жетістіктерді біріктіретін жоғары технологиялық қару-жарақ саласындағы ғылыми-зерттеу жобаларын орындауға бағдарланатын болады.
Күзет және қамтамасыз ету ротасының 18 сарбазына да маңызды әрі жауапты міндет жүктелген. Олар ішкі тәртіпті сақтаумен қатар, жеке құрамды, қару-жарақ пен әскери техниканы, үй-жайларды, мүлікті, университеттің басқа да материалдық құралдарын қорғаумен айналысады, әрі өткізу режимін бақылауды жүзеге асырады.
Жас жауынгерлердің әскери ант беру салтанатын бөлісуге жоғары оқу орнының оқытушылары, Қарулы күштердің ардагерлері, сарбаздардың туыстары мен жақындары келді.
Әскери қызметшілерді ҚР Ұлттық қорғаныс университетінің бастығы генерал-майор Асқар Мұстабеков құттықтады.
Әскерде қызмет ету - әрбір жас жігіттің қасиетті борышы. Отанның, отбасыңыздың, туыстарыңыздың және жақындарыңыздың қорғаушысы болу - құрметті әрі жауапты міндет. Сіздерге қарапайым әскери бөлімде емес, элиталық жоғары әскери оқу орнында қызмет ету мәртебесі беріліп отыр. Қызметтік міндеттерді орындау үшін біз ғылыми-техникалық база бөлігінде де, тұрмыстық тұрғыда да барлық қажетті жағдайларды жасадық, - деді университет бастығы.
Айта кету керек, ант қабылдау рәсіміне дейін әскерге шақырылушылар жас жауынгер курсынан өтті. Бір ай бойы олар саптық, дене шынықтыру, атыс дайындығының, жалпы әскери жарғылардың негіздерін оқып, содан кейін практикалық атыстарды орындады.
Салтанатты бөлімнен кейін жас сарбаздардың ата-аналары мен туыстары казармада болып, әскери қызметшілердің тұрмыс жағдайымен танысты.
Қысқа да нұсқа. Жазылыңыз telegram - ға