Түркістан облысында су тасуы мүмкін аумақтарды шолу жұмыстары жалғасуда
Бұл туралы облыстық ТЖД мәлім етті
Түркістан облысы аумағында Сырдария өзені бойында орналасқан Отырар, Сауран аудандары мен Арыс қаласының аумағына аэровизуалды шолу жұмыстары жалғасуда, деп хабарлайды El.kz ақпарат агенттігі.
Шолу барысында өзен бойына жақын орналасқан елді мекендер мен су нысандарының жай-күйіне бақылау жасалуда. Қазіргі уақытта облысымыздағы су қоймалардың деңгейі қалыпты жағдайда, сондай-ақ барлық су нысандарының жағдайы мен деңгейін бақылау мақсатында облыстық су тасқынына қарсы комиссия құрылған.
Таулы аймақтағы аудандармен (Кентау, Түлкібас, Қазығұрт, Төлеби, Сайрам) өтетін өзен бойларында жалпы 105 су тасқыны және сел қауіпті учаскелер есепке алынған, сол учаскелерде 46 елді мекен орналасқан.
Осы аймақтағы қауіпті учаскелерге мониторинг жүргізу «Қазгидромет» орталығының және «Қазселденқорғау» ММ гидробекеттері арқылы жүзеге асырылуда.
Бүгінгі күні облыс аумағында 51 шақырым канал, 31 шақырым арық-атыздар механикалық тазартудан өткізілді. Бөген өзенінде 4,2 шақырым жаға бекіту, нығайту жұмыстары жүргізілді, 14 шақырым қашыртқы арналардың түбі тереңдетіліп, кеңейтілді. Отырар ауданы аумағындағы Сырдария өзені бойындағы қорғаныс дамбалары 10 жерден нығайтылды. Бұл бағыттағы жұмыстар жалғасын табуда.
Облыстағы құтқару бөлімшелерінің жеке құрамы қызметтің күшейтілген түріне ауыстырылды.
Қысқа да нұсқа. Жазылыңыз telegram - ға