Түркістан облысында мереке күндері қауіпсіздік шаралары күшейтілді
Мереке күндері Түркістан облысында қауіпсіздік шаралары жанданып, тәртіп сақшылары күшейтілген режимде жұмыс істейді. Бұл мәселе облыс әкімі аппаратының апталық мәжілісінде талқыланды. Бұл туралы облыс әкімдігінң баспасөз қызметіне сілтеме жасай отырып El.kz ақпарат агенттігі хабарлайды.
Облыс әкімі Дархан Сатыбалды Төтенше жағдайлар департаменті мен Полиция департаменті өкілдерінің баяндамалары мен ұсыныстарын тыңдады.
Қоғамдық тәртіпті сақтау, тұрғындардың қауіпсіздігін нығайту маңызды. Осы бағытта жұмысты күшейтіңіздер. Әсіресе жастардың, оқушылардың қауіпсіздігін сақтау керек. Қырағылықты төмендетпеңіздер, – деді Дархан Сатыбалды.
Жаңа жылда көпшілік және бұқаралық іс-шаралар көбейетіні белгілі. Осыған байланысты 31 желтоқсан мен 5 қаңтар аралығында Полиция департаменті мен «Ұлттық ұлан» әскери бөлімінің жеке құрамы күшейтілген режимде жұмыс істейді. Облыс аумағында Жаңа жыл мерекесіне орай қоғамдық тәртіпті сақтауға 1423 қызметкер, 124 патрульдік автокөлік жұмылдырылады.
5 желтоқсаннан 3 каңтарға дейін «Пиротехника» жедел профилактикалык ic-шарасы өтуде. Әкімшілік кодексінің 196-бабы бойынша тауарлармен немесе өзге де заттармен заңсыз сауда жасаған 171 дерек анықталып, олардан 728 дана сертификаты жоқ пиротехникалық бұйым тәркіленген, - делінген әкімдік мәліметінде.
Полиция департаменті мен Төтенше жағдайлар департаменті бірлесіп, 106 рет рейд жүргізген. Нәтижесінде пиротехникалық өнімнің рұқсат етілмеген саудасын жүргізген 154 тұлғаға айыппұл салынған.
Жаңа жыл мерекесі қарсаңында және оларды өткізу кезінде қауіпсіздікті қамтамасыз ету мақсатында іс-шаралар өтетін 1184 объектінің тізімі қалыптастырылды. Түркістан облысы аумағындағы орталық алаңдарда көлемі үлкен 19 шырша орнатылған. Оларды төтенше жағдайлар департаментінің өкілдері тұрақты бақылауда. Мерекелік іс-шаралар өтетін 560 нысанның жедел жоспарлары түзетілді. Жоспардан тыс 69 рет өртке қарсы тактикалық сабақтар мен жаттығулар өткізілді.
Қысқа да нұсқа. Жазылыңыз telegram - ға