Теміртау тұрғыны 16 жастағы жасөспірімді гаражда қамап ұстаған
Баланың дамуы тежелген, ешкіммен сөйлеспейді, жаза да, оқи да алмайды
Теміртау тұрғыны 16 жасар баланы гараждардың біріне қамап ұстаған. Полиция жасөспірімді қамауда асыраған әйелді ұстады, деп хабарлайды El.kz ҚазАқпаратқа сілтеме жасап.
Жасөспірімнің осындай қатаң жағдайда өмір сүріп жатқанына Теміртаудың бір тұрғыны куә болған.
Оның айтуынша, 16 жасар ер баланың дамуы тежелген, ешкіммен сөйлеспейді, жаза да, оқи да алмайды.
«Бала патронаттық тәрбиеде өсті. Оның туған ата-анасы қайда екені белгісіз. Сондай-ақ асырап алған адамдарда баланы асырап алу туралы құжаттар мен туу туралы куәлік те жоқ. Сондықтан ол мектепке бармаған шығар. Олар балаға ие бола алмаған кезде гаражға қамап ұстады», - дейді Теміртау тұрғыны.
Бұл жағдай жаздың соңында тәртіп сақшыларына хабарланған.
Қазіргі уақытта полиция жағдайдың егжей-тегжейін, баланың мұндай жағдайға қалай тап болғанын және баланың ата-анасы қайда екенін анықтап жатыр.
«Тамыз айының басында Теміртау қаласының полиция қызметкерлері диспетчерлік пунктке келіп түскен шақыру бойынша гараждан қамауда отырған жасөспірімді тауып алды. Баланы мұндай жағдайда ұстап, асырап жүрген Теміртау тұрғыны анықталды. Аталмыш факті бойынша ҚР ҚК 126 және 141-бабымен қылмыстық іс тіркелді. Қажетті сараптама жасалды. Тергеу жалғасуда», - деп хабарлады Қарағанды облысы ПД баспасөз қызметі.
Қылмыстық кодекстің осы баптары бойынша күдіктілер жалпы есептегенде 5 жылға дейін бас бостандығынан айырылуы мүмкін.
Қысқа да нұсқа. Жазылыңыз telegram - ға