Теміртау тұрғындарына 300 млн теңге қайтарылды
Монополист Теміртау тұрғындарына 300 млн теңгеден астам қаражатты қайтарып берді, деп хабарлайды El.kz ақпараттық агенттігі Бас прокуратурасының баспасөз қызметіне сілтеме жасап.
Прокурорлар Теміртаудың 120 мың тұрғынының құқығын қорғады.
Теміртау қаласының прокуратурасы 2022-2023 жылдар кезеңінде жылумен жабдықтау саласына талдау жүргізді.
Осы жылыту маусымы басталғаннан бері «Оқжетпес-Т» ЖШС-сі «АрселорМиттал Теміртау» АҚ-ның ЖЭО-2 желілерінде жөндеу жұмыстарын жүргізгені анықталды, бұл қала тұрғындарының үйлерінде температуралық режимнің жиі бұзылуына соқтырған.
Тиісінше, мұндай жағдайларда жылу беру қызметтерінің құнын қайта есептеу керек, бірақ монополист мұны жасамаған.
Прокуратураның қадағалау актісі бойынша кәсіпорын жылумен жабдықтауды пайдаланғаны үшін 300 млн теңгеден астам сомаға 120 мың тұрғынға (118 362 жеке тұлға және 1329 бизнес субъектісі) түбіртектерді қайта есептеді.
Қысқа да нұсқа. Жазылыңыз telegram - ға