Татарстан басшысы көшпенділер ойындарының ашылуына қатысу үшін Астанаға келді
Мемлекет басшысы Татарстан Раисы Рустам Миннихановты қабылдады, деп хабарлайды El.kz ақпарат агенттігі.
Қасым-Жомарт Тоқаев V Дүниежүзілік көшпенділер ойындарының ашылу салтанатына қатысу үшін Астанаға келген Рустам Миннихановпен кездесті.
Қазақстан Президенті осы халықаралық маңызды шараға арнайы келген Татарстан Раисына ризашылығын білдірді. Мемлекет басшысы Көшпенділер ойындарына Ресей құрамасының атынан көптеген спортшы қатысатынын, оның ішінде Татарстанның өкілдері де бар екенін атап өтті.
Қазақстан Президенті сауда-экономикалық ынтымақтастық жоспарлы түрде дамып келе жатқанын айтып, машина жасау және мұнай-газ химиясы салаларындағы бірлескен жобаларды уақтылы әрі сапалы іске асырудың маңызына тоқталды.
Рустам Минниханов қонақжайлық танытқаны және түркі халықтарының тарихы, дәстүрі әрі күллі көшпенділер өркениетінің ортақ екенін көрсететін ойындарға шақырғаны үшін Қасым-Жомарт Тоқаевқа алғыс айтты
Татарстан басшысы терең өңделген өнім шығару, IT-индустрия және экономиканың басқа да өзара мүдделі салаларында жаңа бірлескен жобаларды жүзеге асыруға дайын екенін жеткізді.
Кездесуде өңіраралық ынтымақтастық мәселелері және биыл күзде Қазан қаласында өтетін БРИКС саммитінің күн тәртібі талқыланды.
Қысқа да нұсқа. Жазылыңыз telegram - ға