Ташкентте Орталық Азиядағы ең үлкен әуежай салынбақ
Жапонияның Sojitz корпорациясы Өзбекстан астанасы Ташкентте жаңа халықаралық әуежай салуға 1 миллиард доллар көлемінде инвестиция салмақ. Сарапшылардың пікірінше, бұл жоба елді Орталық Азиядағы ең ірі авиациялық хабқа айналдырып, Қазақстанмен көлік және логистика саласында бәсекелестікті күшейтеді. Бұл туралы Finratings.kz сайтына сілтеме жасай отырып El.kz интернет порталы хабарлайды.
Аймақтың болашағына бағытталған жоба
Sojitz корпорациясы мен Сауд Арабиясының Vision Invest компаниясы бұл жобаны мемлекеттік-жекеменшік әріптестік форматында жүзеге асырады. Құрылысты биыл бастау жоспарланып отыр, ал жаңа әуежай 2028 жылы ашылады.
Жоспар бойынша әуежай жылына 20 миллион жолаушыға дейін қабылдай алады және сағатына 40-тан астам ұшу мен қону жүзеге асырылады. Бұл көрсеткіштер жаңа нысанды Орталық Азиядағы ең ірі әуежай деңгейіне шығарады.
Тәжірибелі жапон компаниясы бұған дейін Кумамото, Окинава және Палау әуежайларын дамытуға қатысқан болатын. Енді Sojitz посткеңестік кеңістіктегі дамып келе жатқан нарықтарға ден қойып отыр.
Соңғы жылдары Ташкент Еуропа, Қытай және Таяу Шығыс арасындағы маңызды көлік торабына айналған. Жаңа әуежай бұл рөлді нығайтып, Өзбекстанды аймақтық транзиттік орталыққа айналдыруы тиіс.
Жапонияның Өзбекстандағы ұзақ мерзімді стратегиясы
Sojitz тек авиациямен шектелмейді. Компания Самарқанда түрік Ronesans International компаниясымен бірлесіп, 800 орындық аурухана, қуаттылығы 1 ГВт болатын жел электр станциясы және 1,6 ГВт-тық жылу электр станциясын салып жатыр.
Аймақ үшін жаңа бәсекелестік
Жапония соңғы жылдары Қытай мен Ресейдің ықпалы басым болған аймаққа қайта оралып жатыр. Токионың басты бағыты – инфрақұрылым, энергетика және цифрлық экономика, ал шикізат жобаларына қызығушылығы аз.
Toyota Tsusho (Eurus Energy Holdings арқылы) 500 МВт жел электр паркін,
NEC – деректер орталықтарын,
Marubeni – ағын суларды тазарту зауытын салуда.
Бұл бастамалар жаңа экономикалық тепе-теңдікті қалыптастырып, Орталық Азияны енді «Еуразияның шет аймағы» емес, технология мен транзиттің өзегіне айналдыруда.
Өзбекстан үшін мәні
Егер жоба жоспарға сай жүзеге асса, Ташкенттің жаңа әуежайы заманауи инфрақұрылым мен жаңғырудың символына айналады.
Жапон капиталының келуі инвесторлардың сенімін арттырып, Өзбекстанды «сынақ алаңынан» толыққанды аймақтық нарыққа айналдырады.
Қазақстанға әсері
Ташкенттегі жаңа хабтың құрылуы Қазақстан үшін де маңызды фактор болмақ. Сарапшылардың пікірінше, бұл әуежай Алматы және Астана әуежайларына бәсеке туғызуы мүмкін – бірқатар транзиттік және логистикалық бағыттарды Өзбекстанға тартып алуы ықтимал.
Алайда бұл жағдай Қазақстанға да мүмкіндік тудырады. Ел жүк және чартерлік бағыттарда серіктес ретінде интеграцияланып, аймақаралық маршруттар мен логистикалық тізбектерді дамыту арқылы жаңа деңгейге шығуы мүмкін.
Осылайша, Жапонияның бастамасы Орталық Азияның көлік және экономикалық бірігуінің жаңа кезеңін ашқалы отыр.
Қысқа да нұсқа. Жазылыңыз telegram - ға
Оқи отырыңыз 
