Таиланд әуежайларында туристерді тексеру күшейтіледі
Таиландтың Азаматтық авиация басқармасы (CAAT) ел әуежайларындағы қауіпсіздік шараларын күшейтуді жоспарлап отыр. Бұл бастама авиациялық қауіпсіздік стандарттарын халықаралық ұсынымдарға, соның ішінде АҚШ-тың азаматтық авиация саласындағы талаптарына сәйкестендіруге бағытталған. Алайда жаңа ережелер туризм нарығы өкілдері мен әуежай қызметкерлері арасында алаңдаушылық туғызуда.
Қолмен тексеру міндетті болады
Ең негізгі өзгеріс – қолмен ұстайтын металл іздегіштерден біртіндеп бас тарту. Олардың орнына жолаушыларды қызметкер өзімен бір жынысты бола отырып, міндетті түрде қолмен тексереді.
Бұл тәсіл қауіпсіздікті арттырады деп есептелгенімен, уақытты көбірек талап етеді. Жаңа жүйеге толық көшу 2027 жылдың қаңтарына дейін аяқталмақ. Осы уақыт аралығында тексеру аралас форматта жүргізіледі. Атап айтқанда, металл рамкалар, дене сканерлері және қолмен тексеру қатар қолданылады.
Багажды ескертусіз тексеру құқығы
Қауіпсіздік қызметкерлеріне күдік тудырған кез келген қол жүгін немесе жеке затты алдын ала ескертусіз тексеруге құқық беріледі.
Мұндай тексеру міндетті түрде бейнетіркеуге жазылуы тиіс. Жолаушы талап еткен жағдайда, тексеру жазбасын алуға құқылы болады. Бұл норма биылғы қазан айынан бастап күшіне енуі мүмкін.
Кезек көбейе ме?
Әуежай қызметкерлері қолмен тексерудің уақытты ұзартып, қарбалас сәттерде ұзын-сонар кезек пен рейстердің кешігуіне әкелуі мүмкін екенін айтуда.
Сондай-ақ алдын ала ескертусіз сөмкені ашу жолаушылармен түсінбеушілік туғызып, шағымдар мен даулар санының артуына себеп болуы ықтимал. Әсіресе құнды заттарға қатысты мәселелер күрделенуі мүмкін.
Жолаушылар алымы 53%-ға өседі
Қауіпсіздік шараларымен қатар қаржылық өзгеріс те бар. Airports of Thailand (AOT) компаниясы халықаралық рейстерге арналған жолаушыларға қызмет көрсету алымын көтеретінін растады.
2026 жылғы 20 маусымнан бастап төлем бір адамға шаққанда 730 баттан 1120 батқа дейін өседі. Бұл – 53 пайыздық өсім.
Жаңа тариф Бангкоктағы Суварнабхуми мен Донмыанг әуежайларына, сондай-ақ Чиангмай, Пхукет, Хатъяй және Чианграй әуежайларына қатысты болады. Жаңартылған алым кейбір әлемдік ірі әуежайлардағы көрсеткіштен де жоғары.
Сарапшылар не дейді?
Сарапшылардың айтуынша, алымның өсуі сапар құнына әсер етуі мүмкін. Дегенмен көп жағдайда бұл төлем әуе билеті бағасына енгізіледі.
Мамандар тарифтің көтерілуі әуежай инфрақұрылымы мен қызмет сапасының нақты жақсаруымен негізделуі тиіс екенін айтады.
Қазақстандық туристер нені ескеруі керек?
Таиландқа ұшатын жолаушылар әуежайдағы тексеруден өтуге қосымша уақыт қарастырғаны жөн. Сонымен қатар жол жүру бюджетін есептегенде жаңа алым мөлшерін ескерген дұрыс.
Қазіргі уақытта CAAT тарапынан толық ресми түсіндірме берілмеген, бұл өзгерістер төңірегінде белгілі бір белгісіздік сақталып отыр.
Таиландтағы кедендік тыйымдар: туристерге ескерту
Елге әкелуге тыйым салынған заттар:
- Электронды темекі, вейп құрылғылары және оларға арналған сұйықтықтар;
- Контрафактілі өнімдер (жалған сөмкелер, сағаттар және т.б.);
- Ветеринарлық рұқсатсыз ет және сүт өнімдері;
- Фитосанитарлық сертификатсыз өсімдіктер, тұқымдар және топырақ.
Елден әкетуге болмайтын заттар:
- Будда бейнелері мен мәдени-діни құндылығы бар заттар (арнайы рұқсатсыз);
- 100 жылдан асқан антиквариат және өнер туындылары (лицензиясыз);
- Маржан, тридакна қабыршағы және СИТЕС-пен қорғалатын теңіз түрлері;
- Жабайы жануарлар немесе олардан жасалған бұйымдар (тиісті құжатсыз);
- Қымбат тастар мен зергерлік бұйымдар (заңды сатып алынғанын растайтын құжатсыз).
Қысқа да нұсқа. Жазылыңыз telegram - ға
Оқи отырыңыз 
