SpaceX орбитаға 10 мыңыншы Starlink жерсерігін ұшырды
Өткен жексенбіде SpaceX компаниясы Falcon 9 зымыран-тасығышының көмегімен тағы 56 Starlink жерсерігін ғарышқа ұшырды. Осылайша төменгі Жер орбитасында орналасқан Starlink аппараттарының жалпы саны 10 мыңға жетті. Бұл туралы The Verge-ге сілтеме жасай отырып El.kz интернет порталы хабарлайды.
Жерсеріктердің қозғалысын бақылайтын маман Джонатан Макдауэллдің есебінше, қазіргі уақытта олардың шамамен 8 600-і жұмыс істеп тұр. Starlink спутниктерінің қызмет ету мерзімі орта есеппен 5 жыл, содан кейін олар әдейі орбитадан шығарылып, атмосферада жанып кетеді. Бұл жүйенің алғашқы үлгілері 2018 жылдың ақпанында ұшырылған, ал коммерциялық қызмет 2021 жылы басталған.
Қазір SpaceX-тің 12 мың спутник ұшыруға рұқсаты бар, бірақ компания алдағы уақытта 30 мыңнан астам аппаратты іске қосуды жоспарлап отыр. Мұндай ауқымды жоба әлемге жоғары жылдамдықты, тұрақты интернетті төмен кідіріс уақытымен ұсынуға бағытталған.
Алайда Amazon-ның Project Kuiper, сондай-ақ Еуропа мен Қытайдың өз спутниктік жобалары да бар. Сарапшылар бұл бағыттағы бәсекенің күшеюі Жер орбитасының шамадан тыс толып кетуіне алаңдаушылық тудырып отырғанын айтады.
SpaceX – 2002 жылы құрылған америкалық аэроғарыш компаниясы. Штаб-пәтері Техастағы Starbase орталығында орналасқан. Компания көп мәрте қолданылатын зымырандар, ғарыштық ұшулар және жерсеріктер технологиясын дамытуда әлемдік көшбасшы саналады. 2025 жылы SpaceX зымыран ұшыру қызметтері бойынша әлемдегі жетекші компания мәртебесін сақтап отыр, бұл тұрғыда ол тіпті кейбір ұлттық ғарыш бағдарламаларынан, соның ішінде Қытайдан да алда келеді.
Қысқа да нұсқа. Жазылыңыз telegram - ға
Оқи отырыңыз 
