Шахматтан әлем чемпионатының күміс жүлдегерлері елге оралды
Елордадағы Нұрсұлтан Назарбаев халықаралық әуежайына қазақстандық шахматшы қыздар мінген ұшақ қонды, деп хабарлайды El.kz ақпарат агенттігі.
Ел тәуелсіздігінің тарихында тұңғыш рет шахматтан әлем чемпионатының күміс жүлдегерін Астана қаласының Дене шынықтыру және спорт басқармасының басшысы Самат Жылқыбаев, басқармаға қарасты Спортты олимпиадалық емес түрлері бойынша дамыту дирекциясы және №7 балалар мен жасөспірімдер спорт мектебінің басшылығы сән салтанатпен күтіп алды. Сондай-ақ шахматшы қыздардың ата-аналары, жақындары мен достары да болды.
Бар күшімізді салдық. Жарыс өте тартысы өтті. Бірінші орынға таластық, алайда Грузия құрамасына жол беріп күміс жүлдегер атандық. Қазақстан тарихында тұңғыш рет әлем чемпионатында екінші орынға ие болдық. Өте қуаныштымыз. Қазақ елі қуанды деп ойлаймын, өзімізде де қатты қуанып тұрмыз, - дейді әлем чемпионатының күміс жүлдегері Әмина Қайырбекова.
Айта кету керек, финалда қазақстандық шахматшылар Грузия құрамасына жол берді. Ақтық кезеңнің алғашқы матчында Қазақстан – 1,5-2,5, екінші матчында – 0,5-3,5 есебімен жеңіліп қалған болатын.
Ұлттық құрама сапында Бибісара Асаубаева, Ксения Балабаева, Алуа Нұрманова Әсел Серікбай және қос астаналық шахматшы – Меруерт Камалиденова мен Әмина Қайырбекова өнер көрсетті.
Ал қола медальді Франция құрамасы иеленді. Олар үшінші орын үшін ойында АҚШ шахматшыларынан айласын асырды.
Еске салсақ, шахматтан 2023 жылғы командалық әлем чемпионаты Польшаның Быдгощ қаласында өтті. Онда 12 команда бақ сынады. Турнир 2007 жылдан бері ұйымдастырылып келеді. Бірақ Қазақстан бұған дейін ширек финалдан әрі асып көрген емес.
Мемлекет басшысы шахматтан Қазақстанның әйелдер құрамасын Польшада өткен командалық әлем чемпионатында күміс медаль ие болуымен құттықтады.
Қысқа да нұсқа. Жазылыңыз telegram - ға