Салауатты күн тәртібіне қалай көшуге болады?
Ұйқының сапасы, тамақтану тәртібі, дене белсенділігі, сондай-ақ кофеинді тұтыну деңгейі адамның жалпы денсаулығы мен жұмыс қабілетіне тікелей әсер етеді. Мамандардың айтуынша, жазғы демалыстан немесе ұзақ үзілістен кейін күн тәртібін қайта қалыпқа келтіру ағза үшін маңызды кезең болып саналады.
Нақты мақсат қою маңызды
Күн тәртібін өзгерту нақты мақсаттардан басталуы тиіс. Олар тым күрделі болмауы керек және күнделікті өмірге оңай енгізілетіндей болғаны жөн. Мысалы, тұрақты ұйқы режимін қалыптастыру, тамақтану уақытын реттеу немесе күн сайын аз да болса қозғалысты арттыру. Мұндай шағын қадамдар ұзақ мерзімді нәтижеге жеткізеді.
Ұйқы денсаулық кепілі
Дұрыс ұйқы ағзаның толық қалпына келуіне мүмкіндік беретін басты факторлардың бірі. Ұйқының жетіспеуі шаршау, зейіннің төмендеуі және көңіл күйдің өзгеруіне алып келеді. Дәрігерлер ересек адамға тәулігіне орта есеппен 7-9 сағат ұйқы қажет екенін айтады.
Мамандар алдымен таңертеңгі ояну уақытын белгілеуге кеңес береді. Сол уақытқа қарай кешкі ұйқы уақыты да жоспарлануы тиіс. Сонымен қатар, ұйықтар алдында телефон, компьютер және теледидарды қолдануды шектеу қажет. Ең бастысы, ұйқы мен ояну уақытын күн сайын тұрақты сақтау.
Тамақтану тәртібін біртіндеп өзгерту керек
Демалыс кезінде тамақтану тәртібі жиі бұзылады. Сондықтан оны бірден емес, біртіндеп қалпына келтірген дұрыс. Мамандар күнделікті рационда көкөніс пен жемістің, ет пен балықтың, жармалардың және сүт өнімдерінің болғанын ұсынады.
Күніне 4-5 рет аз мөлшермен тамақтану ас қорытуға жеңіл әрі артық тамақтанудың алдын алады. Қант мөлшері жоғары тағамдар мен тез дайындалатын өнімдерді шектеу де маңызды. Алдын ала мәзір құру және үйден тамақ алып жүру, дұрыс тамақтануға көмектесетін тиімді тәсілдердің бірі.
Кофе мен су мөлшерін бақылау қажет
Кофеин сергектік бергенімен, оны шамадан тыс қолдану ұйқының бұзылуына және мазасыздыққа әкелуі мүмкін. Сондықтан мамандар кофені күннің бірінші жартысында ішіп, мөлшерін шектеуге кеңес береді.
Сондай-ақ ағзаға жеткілікті мөлшерде су түсуі қажет. Орташа есеппен ересек адам күніне шамамен 2 литр таза су ішуі керек. Су зат алмасуды жақсартып, ағзаның қалыпты жұмыс істеуіне көмектеседі.
Дене белсенділігіне дұрыс оралу маңызды
Ұзақ үзілістен кейін спортпен айналысуды бірден қарқынды түрде бастау дұрыс емес. Алдымен жеңіл жаттығулардан, серуендеуден немесе созылудан бастау ұсынылады. Жүктемені біртіндеп арттыру бұлшықеттер мен буындардың бейімделуіне мүмкіндік береді.
Мамандар сондай-ақ жаттығу кезінде ағзаның сигналдарын ескеруге кеңес береді. Егер шаршау немесе жайсыздық сезілсе, демалған жөн.
Жұмыс ырғағына бейімделу
Демалыстан кейін жұмысқа қайта оралу көптеген адамдар үшін қиындық тудырады. Бұл ағзаның тынығу режимінен белсенділікке ауысуымен байланысты. Мамандар алғашқы күндері жұмыс көлемін дұрыс жоспарлап, күрделі тапсырмаларды біртіндеп қолға алуға кеңес береді.
Сонымен қатар, жұмысқа шығардан бірнеше күн бұрын ұйқы режимін қалпына келтіру маңызды. Өз мамандығының оң тұстарын еске түсіру де психологиялық тұрғыдан бейімделуге көмектеседі.
Қысқа да нұсқа. Жазылыңыз telegram - ға
Оқи отырыңыз 
