Қытайлық компания 11 мыңнан астам электромобилін кері қайтарып жатыр
Қытайлық Li Auto (Lixiang) компаниясы 2024 жылы шығарылған Li Mega үлгісіндегі 11 411 электромобильді кері қайтарып алу туралы шешім қабылдады. Бұл ақпаратты Қытайдың Мемлекеттік нарықты реттеу басқармасы растады, деп хабарлайды El.kz интернет порталы.
Өрт оқиғасы себеп болды
Бұл шешімге Шанхай қаласында орын алған Li Mega электроминивэнінің өртенуі түрткі болған. Оқиға қазан айының соңында Сюйхуэй ауданында тіркелген. Әлеуметтік желілерде тараған видеода көлік қалыпты жағдайда жолмен келе жатқан сәтте шассидің төменгі бөлігінен (батарея орнатылған жерден) от тұтанғаны байқалады. Бірнеше секундтың ішінде жалын бүкіл көлікті шарпығанымен, есіктер автоматты түрде ашылып, жүргізуші мен жолаушы қауіпсіз түрде сыртқа шыққан.
Кейін оқиға орнына Li Auto инженерлері мен өрт сөндіру қызметі келіп, жан-жақты тексеріс пен техникалық сараптама жұмыстарын бастаған.
Техникалық ақау неден туындаған
Ресми мәлімет бойынша, 2024 жылдың 18 ақпаны мен 27 желтоқсаны аралығында шығарылған кейбір көліктерде антикоррозиялық қасиеті жеткіліксіз салқындатқыш сұйықтық қолданылған.
Бұл алюминий пластиналардың коррозиясына, яғни батарея мен қозғалтқыш жүйесіндегі тозуға әкеліп, соның салдарынан өрт шығу қаупін арттыруы мүмкін.
Li Auto компаниясы кері шақыру науқанын 2025 жылғы 7 қарашада бастайды.
Клиенттерге барлық жұмыстар тегін жүргізіледі, оған мыналар кіреді:
-
салқындатқыш сұйықтықты ауыстыру;
-
тартқыш батарея мен алдыңғы қозғалтқыш контроллерін жаңарту.
Сонымен қатар, компания бұлтты ерте ескерту жүйесін (Cloud Early Warning System) енгізгенін мәлімдеді. Бұл жүйе көліктегі ақаулар мен сұйықтық ағуын автоматты түрде анықтап, иелерін мобильді қосымша, eCall жүйесі және жедел байланыс орталығы арқылы хабардар етіп отырады.
Li Auto компаниясының мәлімдемесі
«Өрт шығу ықтималдығы тым аз болғанымен, біз тәуекелге жол бермейміз. Клиенттердің қауіпсіздігі — біздің басымдығымыз», — делінген компанияның ресми хабарламасында.
Li Auto өкілдері кері шақыру тек Li Mega моделіне қатысты екенін, ал компанияның басқа үлгілері бұл науқанға кірмейтінін нақтылады.
Көлік иелеріне ресми хабарлама түскен соң, жақын орналасқан сервис орталығына барып, тегін тексеруден өту ұсынылады.
Қысқа да нұсқа. Жазылыңыз telegram - ға
Оқи отырыңыз 
