Қостанай облысында су тасқынына дайын ба?

Қостанай облысында тасқын суын қауіпсіз өткізу үшін 18 гидротехникалық құрылыс жөнделді, деп хабарлайды El.kz ақпарат агенттігі. 

Сонымен қатар, өңірдің 21 елді мекенінде су тасқынынан қорғау үшін бөгеттер құрылысы аяқталды. Атап айтқанда, Қостанай облысының 9 ауданы мен Рудный қаласында бөгеттер салынды. Жангелдин ауданының Шеген, Сарысу және Тауыш ауылдарында жұмыс аяқталуға жақын.

Тобыл-Торғай бассейндік инспекциясы ірі су қоймаларының жұмыс кестесін бекітті. Су құрылыстарында тәулік бойы мониторинг жүргізілуде, - деді Су ресурстарын реттеу, қорғау және пайдалану комитеті төрағасының орынбасары Темірлан Әбдіқұлов.

Еске салсақ, Су ресурстары және ирригация министрлігі сарапшылармен және Парламент депутаттарымен бірлесіп әзірлеген жаңа Су кодексінің жобасы су тасқыны мен құрғақшылыққа қарсы күрес саласындағы мемлекеттік және жергілікті атқарушы органдардың өкілеттіктерін нақты ажыратуды көздейді.

Атап айтқанда, Су ресурстары және ирригация министрлігі бассейндік су инспекциялары арқылы тасқын суды өткізу және қабылдау кезінде гидротехникалық құрылыстардың жай-күйі мен жұмыс режимін бақылайды. Сонымен қатар, министрлік тасқынды су айдындарына жіберуді қамтамасыз етуі тиіс. 

Төтенше жағдайлар министрлігі су тасқыны мен су тасқынынан туындаған төтенше жағдайлардың алдын алу және салдарын жою жұмысын жүзеге асырады.
 
Жергілікті атқарушы органдар тасқын және еріген қар суының алдын алу және одан қорғауға бағытталған іс-шараларды іске асырады. Елді мекендерді, өнеркәсіптік объектілерді, ауыл шаруашылығы алқаптарын және көлік инфрақұрылымын тасқын және еріген қар суынан қорғау үшін жерүсті су нысандарына санация (тазарту және тереңдету) жүргізеді.

Экология және табиғи ресурстар министрлігі де ЖАО-мен бірге орман екпелерін отырғызу жұмысын жүзеге асырады.  

Ауыл шаруашылығы министрлігі құрғақшылықтың алдын алу үшін ауылшаруашылық жерлерін тиімді пайдалану және дақылдардың құрғақшылыққа төзімді нақты түрлерін өсіру бойынша ұсыныстарды бекітеді.

Бөлісу:

0 0 0 0 0

Қысқа да нұсқа. Жазылыңыз telegram - ға