Қазақстанның Қорғаныс министрі Түркияға сапармен барды
Анкарада қорғаныс ведомствосының басшысы генерал-полковник Руслан Жақсылықов бірқатар кездесулер өткізіп, әскери нысандарды, қорғаныс-өнеркәсіп кешенінің мекемелері мен кәсіпорындарын аралады. Бұл туралы Қорғаныс министрлігінің баспасөз қызметіне сілтеме жасай отырып El.kz ақпарат агенттігі хабарлайды.
Бұл күндері Түркия Республикасының құрылғанына жүз жыл толуына орай шаралар өтіп жатыр. Осы орайда қазақстандық делегация басшысы «Анытқабір» мемориалдық кешенінде Ататүрік ескерткішіне гүл шоқтарын қою рәсіміне қатысты.
Генерал-полковник Руслан Жақсылықовтың Ұлттық қорғаныс министрі Яшар Гюлермен келіссөздері өтті. Тараптар өзара қызығушылық тудыратын салалардағы екіжақты қатынастардың ағымдағы жай-күйі мен алдағы мәселелерін талқылады.
Бұдан өзге ІІМ жандармериясының бас қолбасшысы армия генералы Ариф Четинмен және Түркия Республикасы Қорғаныс өнеркәсібі басқармасының басшысы Халук Гергюнмен кездесулер өтті.
Құрлық әскерлерінің әскери училищесінде ҚР Қорғаныс ведомствосының басшысы осы оқу орнында оқитын қазақстандық курсанттармен кездесті. Министр курсанттардың оқуы, олардың бос уақыттары мен тұрмыс жағдайларының ұйымдастырылуымен танысты. Қорғаныс министрі оларға әскери пәндерді игеруде табандылық тіледі. Оқу орнында алған білімдері мен дағдылары алдағы қызметтеріне сенімді негіз болатынын атап өтті.
Қазақстандық делегация сонымен қатар авиациялық техника мен ұшқышсыз басқарылатын құрылғылар шығаратын Turkish Aerospace Industries – TUSAŞ Aerospace Industries біріккен компаниясына да барды.
Кездесу қорытындысы бойынша Түркия мен Қазақстан арасындағы 2024 жылға арналған әскери ынтымақтастық жоспарына қол қойылды.
ҚР Қорғаныс министрлігі Халықаралық ынтымақтастық департаментінің бастығы полковник Олжас Құсайынов атап өткендей, Қазақстан мен Түркияны екіжақты қарым-қатынастардың табысты дамуының кепілі болып табылатын берік тарихи және мәдени байланыстар біріктіреді. Қазіргі уақытта екі елдің қорғаныс ведомстволары арасында әскери ғылым, білім беру, жауынгерлік дайындық және әскери-техникалық ынтымақтастық саласында өзара іс-қимыл жолға қойылған.
Қысқа да нұсқа. Жазылыңыз telegram - ға