Қазақстанда жұмыс берушілер кімге миллион теңге беруге дайын
2025 жылдың қазан айында Қазақстанның еңбек нарығында сұраныс пен ұсыныс тепе-теңдігі орнады. Бұл туралы Еңбек және халықты әлеуметтік қорғау министрлігі (ЕХӘҚМ) хабарлады, деп жазады El.kz интернет порталы.
Министрлік мәліметінше, жұмыс берушілер ең жоғары жалақыны келесі лауазымдарға ұсынған:
өндіріс басшысының орынбасары – шамамен 1 млн теңге,
компьютерлік ойындар дизайнері – 990 мың теңге,
омбудсмен – 990 мың теңге.
Ал ең жоғары еңбекақы күтетін үміткерлер келесі мамандық иелері болды:
коммерциялық әуе кемесінің ұшқышы – 2,8 млн теңге,
тау-кен саласында өрттің алдын алу және сөндіру жұмыстарының маманы – 2 млн теңге,
басқарма төрағасының орынбасары – 1,8 млн теңге.
Ұсынылатын және күтілетін жалақы деңгейі арасындағы айырмашылық сақталып отыр, әсіресе басқару және техникалық салада, – деп мәлімдеді ЕХӘҚМ баспасөз қызметі.
Еңбек нарығының жалпы көрінісі
Қазан айында Enbek.kz электронды еңбек биржасында жұмыс берушілер 132 мың бос орын және 114,1 мың түйіндеме жариялаған. Қыркүйекпен салыстырғанда сұраныс 4,5%-ға (-6,2 мың), ал ұсыныс 12,6%-ға (-16,5 мың) азайған.
Белсенділіктің сәл төмендеуіне қарамастан, еңбек нарығы тұрақтылығын сақтап отыр – сұраныс пен ұсыныс арақатынасы тең деңгейде.
Ең белсенді салалар
Ведомство мәліметінше, бос орындардың ең көбі білім беру саласында – 41,1 мың (31%), одан кейін қызмет көрсету саласында – 17,5 мың (13%), және денсаулық сақтау мен әлеуметтік қамту саласында – 11,7 мың (9%).
Бұл үш бағыт барлық бос орындардың жартысына жуығын қамтып, әлеуметтік сектордың жұмыспен қамтудағы маңызды рөлін көрсетеді.
Біліктілік деңгейі бойынша бөлініс
Қазан айында жұмыс берушілер көбіне орта деңгейлі мамандарды іздеген – 64,4 мың бос орын.
Жоғары білікті мамандар үшін – 34,7 мың,
біліктілігі жоқ жұмысшылар үшін – 32,9 мың орын ұсынылған.
Үміткерлер тарапынан да құрылым ұқсас:
орта біліктілік – 47,7 мың түйіндеме,
жоғары біліктілік – 40,6 мың,
төмен біліктілік – 25,8 мың.
Бұл еңбек нарығында айқын теңгерімнің орнағанын және біліктілік деңгейлері бойынша айтарлықтай дисбаланс жоқ екенін көрсетеді.
Өңірлік және демографиялық құрылым
Қазан айында жұмыс берушілер мен үміткерлердің белсенділігі өңірлер бойынша біркелкі болды, бұл аймақтық еңбек нарығының тұрақтанғанын аңғартады.
Ең көп бос орын Түркістан облысында – 12 мың, Астанада – 11,4 мың, Жамбыл облысында – 8,8 мың тіркелген.
Ал түйіндеме саны бойынша көшбасшылар: Түркістан облысы (13,4 мың), Астана (9,1 мың) және Қызылорда облысы (8,3 мың).
Жас құрылымы бойынша:
34 жасқа дейінгі азаматтар – 51,4 мың түйіндеме (45%),
35–44 жас аралығы – 26% (29,2 мың),
45–54 жас аралығы – 19% (21,8 мың),
55 жастан асқандар – 10% (11,7 мың).
Әйелдер дәстүрлі түрде белсендірек – барлық түйіндемелердің 52%-ын әйелдер орналастырған.
Ең сұранысқа ие мамандықтар
Қазанда жоғары білікті мамандар арасында ең сұранысқа ие мамандықтар – тәрбиеші (1,8 мың бос орын), бухгалтер (1,1 мың) және математика пәні мұғалімі (1 мың) болды.
Орта деңгейлі мамандар арасында қазандық операторлары (6,9 мың), дала егіншілері (2,2 мың) және мейірбикелер (1,9 мың) көп қажет етілді.
Ал үміткерлер арасында да ұқсас үрдіс байқалды: жоғары біліктілердің көбі бухгалтер (2,2 мың), заңгер (1,6 мың) және тәрбиеші (1,6 мың) мамандықтары бойынша түйіндеме жіберген, ал орта деңгейлілер арасында қазандық операторлары (3,7 мың), мейірбикелер (1,9 мың) және автокөлік жүргізушілері (1,6 мың) жетекші орын алды, – делінген министрлік хабарламасында.
Қорытындылай келе, ЕХӘҚМ еңбек нарығының жалпы тұрақтылығын атап өтті:
Білім беру, денсаулық сақтау және қызмет көрсету сияқты әлеуметтік бағыттағы салалар жұмыспен қамтудың негізгі тірегі болып қала береді. Көрсеткіштердің қалыпты өзгерістері еңбек нарығының жазғы маусымнан кейінгі тұрақтануын және сұраныс пен ұсыныстың тепе-теңдігін айғақтайды.
Қысқа да нұсқа. Жазылыңыз telegram - ға
Оқи отырыңыз 
