Қазақстанда табыс пен мүлікке салық артады
Қасым-Жомарт Тоқаев табыс пен мүлікке салық салудың жаңа жүйесін енгізуді ұсынды, деп хабарлайды El.kz ақпарат агенттігі. Ол үшін салық мамандарымен қатар экономистер мен бизнес өкілдері тартылмақ.
Табыс пен мүлікке салық салудың жаңа жүйесін енгізбесек, кәсіпкерлерді табысын қалтаға баспай, бизнесін дамыту үшін жұмсауға ынталандырмасақ, арнайы салық режимдерін өзгертпесек, бұл міндетті орындай алмаймыз. Сондықтан Салық кодексі секілді стратегиялық маңызы бар құжатты әзірлеуге осы сала мамандарынан бөлек экономистер мен бизнес өкілдері жұмылдырылуы қажет. Әрине, бюджет қоржынын толтыру міндетін ұмытуға болмайды. Экономика неғұрлым қуатты болса, соғұрлым көп салық түседі деген қағидатты берік ұстану керек, - деді Тоқаев.
Дегенмен салықты көтеру үшін бұл жүйені реттеп алу керек.
Салықты жайдан жай көбейте салуға болмайды. Ең алдымен, салық салу жүйесін реттеп, оны жетілдіру қажет. Сондай-ақ, көлеңкелі экономиканы барынша азайту керек. Яғни, салық жүйесін басқару жұмысы дұрыс жолға қойылмаса, ең озық деген салық саясатының өзі тиімсіз болып шығады, - деді ол.
Бұл мәселені қарастыруда жаңадан құрылған Үкіметке бірқатар міндет жүктелетінін еске салып, бұған дейінгі тапсырмасының орындалмағанын да тілге тиек етті.
Үкімет салық жеңілдіктерін берудің ашық әрі нақты ережелерін әзірлеуге тиіс. Қаржы министрлігінің мәліметі бойынша жеңілдік берудің салдарынан жыл сайын бюджетке орташа есеппен 7 триллионға жуық теңге кем түседі. Мен салық жеңілдіктерін 20 пайызға азайту туралы тапсырма бердім. Бірақ әлі күнге дейін орындалған жоқ, тіпті, мәселені шешу жолдары да әзір емес, - деді президент.
Қысқа да нұсқа. Жазылыңыз telegram - ға