Қазақстанда соңғы 10 жылда нәресте өлімі 32%-ға төмендеді
Бұл туралы неонатологтардың «Жаңа туған пациенттерге барынша жақсы күтім жасау – негізгіге оралу» ғылыми-практикалық конференциясы барысында хабарлады, деп хабарлайды El.kz ақпарат агенттігі.
ҚР-да неонаталдық өлім көрсеткіші Орталық Азия елдерінің арасында ең төмен болып табылады, бұл ортаеуропалық мәнге сәйкес келеді.
Әртүрлі мемлекеттік бағдарламаларды жүзеге асырудың арқасында нәресте өлімін төмендету мүмкін болғаны атап өтілді. Мәселен, Министрлік ана мен баланың денсаулығын жақсарту жөніндегі іс-қимыл жоспарын бекітті, онда жүкті әйелдер мен балаларға медициналық көмек көрсетуді жетілдіру, перинаталдық орталықтарды жаңғырту және жаңа балалар клиникаларын салу жөніндегі іс-шаралар көзделген.
Конференция Қазақстанда неонаталдық өлімді төмендету үшін жаңа туған балаларға көрсетілетін медициналық көмектің сапасын жетілдіру, сондай-ақ неонатология мен перинатологиядағы халықаралық және өңірлік көшбасшылармен ынтымақтастықты одан әрі тереңдету мақсатында ұйымдастырылды. Кездесуге АҚШ, Франция, Норвегия, Швеция, Польша, Литва Республикасының неонатология және перинатология саласындағы сарапшылары қатысты.
Конференцияға қатысушылар заманауи ғылыми зерттеулер мен клиникалық практикаға негізделген жаңа туған нәрестелер мен шала туған нәрестелерге күтім жасау бойынша жаңа туған нәрестені бастапқы реанимациялау және алтын сағат, емшек сүтімен қоректендірудің артықшылықтары, неонатологиядағы респираторлық қолдау, жаңа туған нәрестелердегі гемодинамикалық мәртебені бағалау және қолдау және т. б. сияқты озық тәсілдерін талқылады.
Қысқа да нұсқа. Жазылыңыз telegram - ға