7 тамыз күні өткен үкіметтік баспасөз мәслихатында премьер-министрдің орынбасары Қанат Бозымбаев халықтың әлеуметтік осал топтарына көрсетілетін тұрғын үй көмегі әлеуметтік әмиян жүйесіне енгізілетінін мәлімдеді, деп хабарлайды El.kz интернет порталы.

Бұл қадам – коммуналдық қызмет тарифтерінің өсуі жағдайында азаматтарды қолдауға бағытталған маңызды әлеуметтік шаралардың бірі. Оның айтуынша, тарифтердің өсуі халық табысымен сәйкес келмеген жағдайда, тұрғындардың ай сайынғы коммуналдық шығындары жалпы табысының белгілі бір пайызынан асып кетсе, мемлекет тарапынан өтемақы төленеді.

Бұл көрсеткіш өңірлік ерекшеліктерге байланысты өзгеруі мүмкін – мысалы, Астана мен Алматыда табыс деңгейі жоғары болғандықтан пайыздық шегі де жоғары болуы ықтимал, ал Атырау мен Қызылорда сияқты аймақтарда 5-7 пайыз деңгейінде белгіленуі мүмкін. Осылайша, тұрғын үй көмегі нақты мұқтаж азаматтарға бағытталады және ол тікелей әлеуметтік әмиян арқылы жүзеге асады. Алайда бұл көмек барлық азаматтарға бірдей берілмейді.