Қазақстанда алғашқы әскери дайындық ережелері жаңартылды
Қазақстанда мектеп, колледж және кәсіби білім беру мекемелерінде алғашқы әскери дайындықты ұйымдастыру мен өткізуге арналған жаңа ережелер бекітілді. Қорғаныс министрі бұйрыққа 4 қарашада қол қойды, деп хабарлайды El.kz интернет порталы.
Жаңартылған қағидалар оқушылар мен студенттерді әскери қызметке даярлауды күшейтуді, практикалық сабақтар мен далалық оқу элементтерін кеңейтуді көздейді. Пәннің тарихи атауы «алғашқы әскери дайындық» қайта оралды, әрі бағдарламаны жүргізетін педагогтарға қойылатын талаптар нақты көрсетілді. Енді сабақтарды тек педагогикалық білімі бар және әскери қызмет тәжірибесі бар мамандар жүргізе алады. Сонымен қатар, кемінде он жыл әскери қызмет атқарған азаматтар Қорғаныс министрлігінің оқу базасында тегін қайта даярлықтан өту мүмкіндігіне ие.
Қорғаныс министрлігінің кеңесшісі Айгүл Төлембаеваның айтуынша, жаңартулар әскерге шақырылушылардың даярлығын арттыруға бағытталған.
Біз балаларға әскери қызметтің міндеттері мен құқықтарын, әскери жарғыны, қызметтен кейінгі әлеуметтік кепілдіктерді нақты көрсетуіміз керек. Бұл олардың армиядағы өмірді түсінуіне көмектеседі, - дейді Айгүл Төлембаева.
Сонымен қатар, әскери бөлімдер оқу-далалық жиындарға белсенді қатысады. Командирлер жеке сабақтар мен далалық база көрсетулеріне қатысады, ал оқытушылардың біліктілігі тек әскери жоғары оқу орындарында, кафедраларда және ведомстволық ұйымдар базасында жетілдіріледі. Бұл оқушылардың сенімін арттырып, армияның жұмысын нақты көруге мүмкіндік береді.
Жаңартылған ережелердің басты мақсаты - оқушылар мен студенттерді практикалық және теориялық тұрғыдан дайын етіп, әскерге бейімдеу.
Қысқа да нұсқа. Жазылыңыз telegram - ға
Оқи отырыңыз 
