Қазақстан каратэшілері Азия чемпионатында топ жарды
Алматы қаласындағы Балуан Шолақ атындағы спорт кешенінде ересектер арасында Азияның I ашық чемпионаты аяқталды, деп хабарлайды El.kz ақпарат агенттігі спортты дамыту дирекциясына сілтеме жасап.
Жалпы есепте 1-орын алған Қазақстан құрамасының қоржынында 8 алтын, 8 күміс пен 14 қола медаль бар. Ал екінші орында Иран (3 алтын, 2 күміс, 3 қола) болса, одан кейін 2 алтын жүлдемен Біріккен Араб Әмірліктері тұр.
Чемпионатқа 10 елден 140-қа жуық спортшы қатысқан болатын. Олардың қатарында Германия, Үндістан, Иран, Қазақстан, Кувейт, Қырғызстан, Ресей, Түрікменстан, Сауд Арабиясы, Біріккен Араб Әмірліктері сынды мемлекет бар.
Доданың соңғы күнінде командалық сында жүлделі орындар сарапқа салынды. Кумите бағдарламасында Қазақстан ерлер командасы алтын, ал әйелдер қола жүлдеге ие болды.
Бәсекеде алтын медальді Ұлмекен Жалғас (68 келіден жоғары), Самашева Бэлла (55 кг), Даяна Даренская (61 кг), Диас Анарбеков (84 келіден жоғары), Жоламан Биғабыл (60 кг), Ерсұлтан Тәңірберген (67 кг), Диас Ұлбек (84 кг) жеңіп алды.
Күміс жүлде ката бойынша Лия Қошқарбаева, Мәди Катешов, кумитеден Әйгерім Тұрсынбекова (50 кг), Гүлмира Үсенова (61 кг), Николь Ценгель (61 кг), Дархан Тимралиев (60 кг), Әбілмансұр Батырғалиға (75 кг), Айдос Мұхатқа (67 кг) бұйырды.
Сондай-ақ Ердос Кенжеғалиев (ката), Арина Якубина (68 келіден жоғары), Алина Сұлтанова (50 кг), Ақниет Шеризат (50 кг), Айжан Бакирова (61 кг), Венера Жақсыбаева (68 кг), Милана Власенко (68 кг), Айбек Шарап (60 кг), Дамир Нұрберген (75 кг), Азамат Марат (75 кг), Никита Тарнакин (84 кг) қола еншіледі.
Қысқа да нұсқа. Жазылыңыз telegram - ға